हेटौंडामा पनि मनाइयो विश्व सुर्तिजन्य पदार्थ विरुद्धको दिवस

१८ जेठ, हेटौंडा । बागमती प्रदेशको राजधानी हेटौंडामा मंगलबार विश्व सुर्तिजन्य पदार्थ विरुद्धको दिवस विभिन्न कार्यक्रम गरी मनाइएको छ । 
स्वास्थ्य निर्देशनालय बागमती प्रदेशको आयोजनामा दिवसको आवसर पारेर मंगलबार बिहान प्रभातफेरी, सचेतनामूलक कार्यक्र र सडक नाटकको आयोजना गरी मनाइएको हो ।
बागमती प्रदेश स्वास्थ्य निर्देशनालयका प्रमुख डा. महेश्वर श्रेष्ठको नेतृत्व तथा बागमती प्रदेश स्वास्थ्य मन्त्री निमा लामाको उपस्थितिमा प्रभातफेरी तथा सचेतनामूलक कार्यक्रम गरिएको हो । 
प्रभातपेरी कार्यक्रमको सुरुवात गर्दै प्रदेशका स्वास्थ्य मन्त्री निमा लामाले सुर्तिजन्य पदार्थको प्रयोग गर्ने कार्य आजकै दिनबाट बन्द गर्ने सार्वजनिक रुपमा घोषणा गर्न आग्रह गरे । उनले सुर्तिजन्य पदार्थ प्रयोग नगर्न आग्रह गर्दै बालबालिकाहरुलाई सुर्तिजन्य पदार्थबाट टाडै राख्न अनुरोध समेत गरे ।
मन्त्री लामाले स्वास्थ्य र शिक्षालाई प्राथमिकता दिएको बागमती प्रदेश सरकारले नीति तथा कार्यक्रम मार्फत प्रदेशको स्वास्थ्यको क्षेत्रमा योगदान पुग्ने किसिमका कार्यक्रम ल्याउने तयारी गरेको जानकारी दिए । उनले बागमती प्रदेशलाई स्वास्थ्य क्षेत्रको हबका रुपमा विकास गर्न आफुहरु दत्तचित्त भएर लागिरहेको दावी गरे ।
बागमती प्रदेश सरकारको स्वास्थ्य निर्देशनालय, नेपाल अर्वुद रोग निवारण संस्था र श्रीकृष्ण प्रणामी युवा परिषद् मकवानपुरको संयुक्त आयोजनामा भएको प्रभातफेरी बुद्धचोकबाट सुरु भई लोकप्रिय चोक, मानसचोक, कांग्रेसचोक, कान्तिराजपथ, पारिजातपथ, सिमाचोक हुँदै पुनः बुद्ध चोकमा पुगेर अन्त्य भएको थियो । 
प्रभातफेरी कार्यक्रमपछि बुद्धचोकमै सूर्तिजन्य पदार्थ प्रयोग नगर्न आग्रह गर्दै सडक नाटक र सचेतनामूलक कार्यक्रम प्रस्तुत गरिएका थिए ।