स्थानीय तह सहीद स्मृति अन्तर्राष्ट्रिय मकवानपुर गोल्डकप आजबाट

१९ जेठ, हेटौंडा । मकवानपुर फुटबल संघको आयोजनामा स्थानीय तह सहीद स्मृति अन्तर्राष्ट्रिय मकवानपुर गोल्डकप प्रतियोगिता २०७९ आजबाट सुरु हुँदैछ । हेटौंडा–५ स्थित पिप्ले क्याम्पा रंंगशालामा हुने प्रतियोगिताको सम्पूर्ण तयारी पुरा भएको मकवानपुर फुटबल संघका महासचिव छवि सुवेदीले जानकारी दिए । 
आजबाट सुरु हुने प्रतियोगिताको उद्घाटन खेलमा सर्लाहीको बागमती युवा क्लब र सिमराको नवजनजागृति युवा क्लबबीच खेल प्रतिष्पर्धा हुने छ । ३० गतेसम्म सञ्चालन हुने प्रतियोगितामा १२ वटा क्लबको सहभागिता रहेको छ ।
प्रतियोगितामा विभागीय क्लबहरु नेपाल आर्मी क्लब, नेपाल पुलिस क्लब, सशस्त्र प्रहरीको (एपीएफ) क्लब, मनाङ मस्र्याङ्दी क्लब, फ्रेण्डस्, खुमलटार युथ क्लब, नवजनजागृति युवा क्लब सिमरा, सर्लाहीको बागमती युवा क्लब, विजय युथ क्लब हेटौंडा, चितवन–११, चर्च ब्वाइज क्लब र क्यामरुनको एभिनियर एफसी सहभागी रहेको महासविच सुवेदीले जानकारी दिए ।
प्रतियोगिताको विजेताले १५ लाख र उपविजेताले १० लाख रुपैयाँसहित ट्रफी प्राप्त गर्नेछन् । प्रतियोगिताको उत्कृष्ट गोलरक्षक, डिफेन्डर, मिडफिल्डर, फरवार्ड, सर्वाधिक गोलकर्ता तथा उत्कृष्ट प्रशिक्षकलाई जनही २५ हजार रुपैयाँ तथा प्रत्येक खेलको म्यान अफ द म्याचलाई नगद १० हजार रुपैयाँसहित ट्रफी प्रदान गरिनेछ । 
यस्तै प्रतियोगिताको सर्वोत्कृष्ट खेलाडलाई बुलेट मोटरसाइकल प्रदान गरिने प्रतियोगिता संयोजक प्रताप बिष्टले जानकारी दिए । प्रतियोगिता हेर्नको लागि पहिलो चरणको खेलमा एक सय रुपैयाँ, सेमिफाइनलमा दुई सय रुपैयाँ र फाइनल खेलमा २५० रुपैयाँ टिकट मूल्य तोकिएको छ ।