हेटौंडा उपमहानगरको पहिलो कार्यपालिका बैठकमै एमालेको अवरोध

२० जेठ, हेटौंडा । स्थानीय तहको निर्वाचन अन्तर्गत हेटौंडा उपमहानगरपालिकासहित मकवानपुरको ८ स्थानीय तहमा हार व्यहोरेको नेकपा एमालेले हेटौंडा उपमहानगरपालिकाको पहिलो कार्यपालिका बैठकमा अवरोध सृजना गरेको छ । 
बिहीबार बसेको कार्यपालिका बैठकमा एमालेले अवरोध गरेको हो । एमालेबाट निर्वाचित कार्यपालिका सदस्यहरु बैठकमा उपस्थित भएपनि हाजिर नगरी विरोध जनाएपछि त्यसै स्थगित भएको हो । बैठकमा पेश भएको विपन्न परिवारका लागि खानेपानी, बीमा र विजुलीको महसुल छुट दिने बिषयको प्रस्तावमा एमालेले विरोध जनाएको हो । 
गठबन्धनबाट विजयी भएका मेयर मीनाकुमारी लामा र उपमेयर राजेश बानियाँले पदभार ग्रहण गर्दै उपमहानगरपालिकाको विपन्न परिवारका लागि खानेपानी र विजुलीको महसुल छुट दिने र स्वास्थ्य बीमा गरिदिने निर्णय गरेका थिए । 
नगरबासीहरुको अति आवश्यक गाँस बास संग जोडिएको बिजुली र खानेपानीको विषयलाई बेवास्ता गर्दै एमाले निकट कार्यपालिका सदस्यहरुले विरोध जनाएको भन्दै सत्ता गठबन्धनबाट जितेका कार्यपालिका सदस्य रुष्ट बनेका छन् । मेयर लामाले अति विपन्न घरपरिवारलाई मासिक खानेपानी र २५ युनिटसम्म विद्युत निःशुल्क उपलब्ध गराउने प्रस्ताव पेश गरेकी थिइन् । 
बैठकमा २९ जना कार्यपालिका सदस्यमध्ये १७ जना एमाले निकट रहेका छन् भने १२ जना गठबन्धनका रहेका छन् । कार्यपालिकाको पहिलो बैठकमै एमालेले दम्भ देखाउन सुरु गरेको गठबन्धनका नेताहरुको आरोप छ । 
पहिलो बैठकमै विवाद सुरु भएपछि नगरबासीले कार्यपालिका बैठक लाइभ गर्नुपर्ने माग गरेका छन् । मेयर लामाले आगामी बैठकहरु प्रत्यक्ष प्रशारण हुनसक्ने संकेत गरेकी छिन् ।