जनकल्याणको अध्यक्षमा हिमाल विजयी

१२ कार्तिक, हेटौँडा । हेटौँडा–६ चौघडामा रहेको जनकल्याण बचत तथा ऋण सहकारी संस्थाको अध्यक्षमा हिमाल पौडेल विजयी भएका छन् । 
आइतबार विहान सम्पन्न मतगणना अनुसार पौडेल २ सय ३ मतले विजयी भएका हुन् । पौडेलले ६ सय ४७ मत ल्याए भने उनका निकटतम प्रतिष्पर्धी नारायणप्रसाद अधिकारीले ४ सय ४४ मत ल्याएका थिए । त्यसैगरी लेखा सुपरिवेक्षण समिति संयोजकमा दिपनराज आचार्य विजयी भएका छन् । उनले ५ सय ७६ मत ल्याए भने निकटतम प्रतिष्पर्धी जयराम घिमिरेले ३ सय १५ मत ल्याएका छन् । 
खुल्ला सदस्यमा तेजप्रसाद भट्टराई, तेजप्रसाद तिवारी, लक्ष्मण सापकोटा र प्रदिप ढुंगाना विजयी भएका छन् । महिला सदस्यमा हिरादेवी महर्जन, रेखा मैनाली र निर्मला अर्याल विजयी भएको निर्वाचन अधिकृत बद्रीबहादुर पाठकले जानकारी दिए । यसअघि, संस्थाको उपाध्यक्षमा श्यामप्रसाद भट्टराई, सचिव मिना अधिकारी, कोषाध्यक्षमा चेतनाथ खतिवडा, लेखा सुपरिवेक्षण समिति सदस्यमा राजकुमार बास्तोला र रामशरण पौडेल निर्विरोध भएका थिए ।
विजय घोषणा कार्यक्रममा निर्वाचन अधिकृत पाठक, सदस्यहरु बद्री भण्डारी, अश्विन अर्याल, हेटौँडा ६ नम्बर वडा अध्यक्ष अर्जुनप्रसाद चौलागाई, संस्थाका पूर्व अध्यक्ष रघुप्रसाद आचार्य लगायतको उपस्थिति रहेको थियो । एक हजार ६ सय १६ शेयर सदस्य रहेको संस्थाको निर्वाचनमा एक हजार एक सय ३४ मत खसेको थियो ।