मकवानपुर गोल्डकपः मनाङलाई हराउँदै पुलिस सेमिफाइनलमा

२५ जेठ, हेटौंडा । विभागीय टोली नेपाल पुलिस क्लव हेटौंडामा जारी चौथो शहिद स्मृति स्थानीय तह मकवानपुर गोल्डकप २०७९ को सेमिफाइनलमा प्रवेश गरेको छ ।
मंगलबार भएको खेलमा मनाङलाई पुलिसले १–० गोल अन्तरले हराउँदै पुलिस अन्तिम ४ मा स्थान सुरक्षित गर्न सफल भएको हो । पुलिसको जितका लागी ३४ औं मिनेटमा भरत शाहले गरेको गोल निर्णायक बन्यो ।
खेलको ४१ औं मिनेटमा मनाङले बराबरी गोल गर्ने मौका पाएपनि सदुपयोग गर्न सकेन । पुलिसका अजित भण्डारीले विमल घर्ती मगरलाई डीबक्स क्षेत्रमा लडाएपछि पाएको सदुपायेग गर्न नसक्दा मनाङ पछि प¥यो । मनाङका अन्जन बिष्टले प्रहर गरेको पेनाल्टी पुलिसका गोलरक्षक सत्रुघन चौधरीले बचाउ गरेका थिए ।
खेलको म्यान अफ द म्याच पुलिसका गोलरक्षक सत्रुघन चौधरी भए । उनले नगद १० हजार रुपैयाँसहित ट्रफी प्राप्त गरे । जारी प्रतियोगितामा बुधबार मकवानपुरको विजय यूथ नव जनजागृति क्लव सिमराको खेल हुनेछ । 
यस्तै मंगलबारको खेलमा नेपाल पुलिस क्लवका प्रशिक्षक र खेलाडी गरी तीनजनाले रातो कार्ड पाएका छन् । प्रशिक्षक अनन्त थापा तथा खेलाडी हेम तामाङ र हेमन्त श्रेष्ठले रातो कार्ड पाएका हुन् । 
श्रेष्ठले मैदान प्रवेश नगर्दै रातो कार्ड पाएका हुन् । मैदान छिर्न ‘वार्मअप’ गरिरहेका बेला ‘अफसाइड’को बिषयलाई लिएर निर्णायकसंग विवाद गरेपछि दोहोरो कार्ड पाएपछि उनलाई रातो कार्ड दिइएको थियो ।
यस्तै पुलिसका तामाङले अन्जन बिष्टलाई हात हालेपछि र प्रशिक्षक थापालाई रेफ्रिको निर्णयमा असन्तुष्टि जनाउँदै खेल मैदान प्रवेश गर्न खोजेपछि रातो कार्ड दिइएको हो ।
मकवानपुर जिल्ला फुटबल संघको आयोजनामा जारी प्रतियोगिताको विजेताले १५ लाख र उपविजेताले १० लाख रुपैयाँ तथा सर्वोत्कृष्ट खेलाडीले मोटरसाइकल र विधागत उत्कृष्ट खेलाडीले जनही २५ हजार रुपैयाँ प्राप्त गर्नेछन् ।