उठ्लान् त कमल थापा ?

१४ कार्तिक, हेटौँडा । गठबन्धनबाट उम्मेदवार बन्ने करिव निश्चित भईसकेका कमल थापा केही असन्तुष्ट कांग्रेसको कदम पछि के गर्लान् भन्ने चर्चा अहिले मकवानपुरमा छ । गठबन्धन भए जित सुनिश्चित रहेको भन्दै गाउँमा केही कार्यक्रम गरेर काठमाण्डौं फर्किएका थापालाई कांग्रेसको यो कदमले झड्का भने लागेको छ । 
तल्लो तहमा भन्दा सिधै केन्द्रमा तालमेलको गाँठो कसेका उनलाई स्थानीय कार्यकर्ताले गाँठो फुस्काई दिने चेतावनी दिएपछि तनाव बढेको छ । झापामा राप्रपाका राजेन्द्र लिङ्देलले उम्मेदवारी दिने तय भएको क्षेत्रमा कृष्ण सिटौलालाई उम्मेदवार बनाउने कांग्रेस केन्द्रको निर्णयको असर मकवानपुरमा परेको राप्रपा मकवानपुरका नेताहरुको भनाई छ । उनीहरु अझै पनि कांग्रेसले अहिलेको तनावलाई मिलाउनेमा आशावादी रहेका छन् ।
एक जिल्ला नेताका अनुसार केन्द्रीय तह र जिल्लाका शिर्ष तहमा दुई पार्टीबीच छलफल भईरहेको भन्दै सोमबार रातिको पत्रकार सम्मेलनले गठबन्धनमा असर नपर्ने दावि गरेका छन् । ‘असन्तुष्ट केही नेताहरुले पत्रकार सम्मेलन गरेका रहेछन्’–उनले भने–‘पार्टीको आधिकारिक धारणा र शिर्ष नेतृत्वको उपस्थिति नभई अहिले नै अड्कलबाजी गर्नु ठिक हुँदैन ।’
तर राप्रपा अध्यक्ष कमल थापाले भने कांग्रेसकै सहयोगमा उम्मेदवार बन्ने जनाएका छन् । केन्द्रीय कार्यसमितिको निर्णयमा पनि थापालाई मकवानपुर क्षेत्र नम्बर १ मा उठाउने निर्णय राप्रपाको छ । सामाजिक सञ्जाल ट्वीटरमा आफु राप्रपाको तर्फबाट मकवानपुर क्षेत्र नम्बर १ बाट उम्मेदवार बन्ने जनाउँदै सहयोगका लागि उनले अपिल गरेका छन् । 
उनले अपिल गरेको केही बेरपछि नै कांग्रेसमा असन्तुष्ट पक्षले पत्रकार सम्मेलन गरी सहयोग नगर्ने घोषणा गरेपनि भने कमल थापा के गर्लान् भन्ने अन्यौलता बढेको छ ।