देशका विभिन्न राजमार्ग पहिरोले अवरुद्ध

बाढीले बगाएको पुर्व पश्चिम राजमार्ग अन्तर्गतको डाइभर्सन

१५ असार,हेटौंडा। मंगलबार राति देखीको अविरल बर्षाका कारण पहिरो जादा देशका विभिन्न राजमार्ग अवरुद्ध बनेका छन्। 
पृथ्वीराजमार्ग अन्तर्गत तनहुँको आँबुखैरेनी–मुग्लिन सडकखण्ड अवरुद्ध भएको छ।आँबुखैरेनी गाउँपालिका–२ स्थित ऐनापहरामा पहिरो जाँदा आज बिहानदेखि उक्त सडकखण्ड अवरुद्ध भएको  तनहुँ प्रहरीले जनाएको छ। 

त्यसैगरी खहरेमा आएको बाढीले पुर्व पश्चिम राजमार्ग अवरुद्ध बनाएको छ। नवलपुर (नवलपरासी पूर्व)को मध्यविन्दु नगरपालिका १० मा पर्ने तीनवटा खहरे खोलाको डाइभर्सन बाढीले बगाएपछि पूर्व–पश्चिम राजमार्ग अवरुद्ध भएको हो ।नवलपुरको मध्यविन्दु १० मा रहेको ठुलो खहरे र सानो खहरे र विनयी त्रिवेणीको जमुने खहरे खोलाको डाइभर्सन बाढीले बगाएको नवलपुर प्रहरीले बताएको छ। 
त्यसैगरी राष्ट्रिय गौरवको आयोजनाका रूपमा रहेको मध्यपहाडी पुष्पलाल लोकमार्गको गलकोटबाठ बुर्तिबाङ खण्ड र बागलुङबाट म्याग्दी जाने सडक पहिराले पूर्णरूपमा अवरुद्ध बनाएको छ। लोकमार्गअन्तर्गत गलकोट नगरपालिका र ढोरपाटन नगरपालिकाको तुरतुरेमा पहिरो खस्दा सडक अवरुद्ध भएको जिल्ला प्रहरी कार्यालय बागलुङका सूचना अधिकारी प्रहरी नायब उपरीक्षक इन्द्रबहादुर रानाले जानकारी दिएका छन्।अवरुद्ध सबै सडकखण्ड खुलाउने प्रयास जारी रहेको त्यहाँ स्थित प्रहरी कार्यालयले जनाएका छन्