बानियाँद्वारा १ नम्बर क्षेत्रका मतदाताप्रति आभार व्यक्त

१७ कार्तिक, हेटौँडा । मकवानपुर क्षेत्र नम्बर १ बाट निर्वाचित सांसद ईन्द्रबहादुर बानियाँले त्यस क्षेत्रका मतदाताप्रति आभार व्यक्त गरेका छन् । 
२०७० सालको संविधासभा निर्वाचनमा विजय भएका बानियाँले शुक्रबार प्रेस विज्ञप्ति जारी गर्दै मतदाताप्रति आभार व्यक्त गरेका हुन् । उनले आफुलाई विजयी गराएकोमा आभार व्यक्त गर्दै निर्वाचनका क्रममा गरेको ९० प्रतिशत प्रतिवद्धता पुरा गरेको बताए । ४ बर्षे कार्यकालमा आफुले गरेको विकास निर्माणको कामले दशकौंदेखि यस क्षेत्रको जनताको विकासको माग र आकांक्षा पुरा गर्ने प्रयास गरेको भन्दै उनले आगामी दिनमा पनि यस काममा लागिरहने बताएका छन् ।
आसन्न प्रतिनिधि र प्रदेश सभा निर्वाचनमा देशको असहज परिस्थिति र राष्ट्रिय राजनीतिलाई समेत मध्यनजर गर्दै लोकतान्त्रिक गठबन्धन भएको बताउँदै बानियाँले प्राविधिक कारण आफु मकवानपुरको प्रतिनिधिसभा क्षेत्र नम्बर २ अन्तरगत प्रदेशसभा २ बाट उम्मेदवार बन्नुपरेको बताए । निर्वाचन क्षेत्र फरक रहेपनि भौतिक र भावनात्मक रुपमा मकवानपुर क्षेत्र नम्बर १ का जनता र मतदातासंगै रहेको बानियाँको भनाई छ । नेपाली कांग्रेसको जिल्ला सभापति र पूर्व जनप्रतिनिधिको हैसियतमा आफुले सधैं १ नम्बर क्षेत्रका जनताको सुख दुःख र विकासका हरेक अभियानमा जोडिने प्रतिवद्धता समेत बानियाँले व्यक्त गरेका छन् । 
जनतासंग गरेको प्रतिवद्धता अनुसार नेपाली कांग्रेसकै नेतृत्वमा संघीय लोकतान्त्रिक गणतन्त्रात्मक संविधान ल्याउने काम सम्पन्न भई कार्यान्वयनमा रहेको विषयलाई मूख्य सफलता मान्दै बानियाँले संविधान निर्माणपछि स्थानीय तहको निर्वाचन सम्पन्न भईसकेको र आसन्न प्रतिनिधि र प्रदेश सभाको निर्वाचन सम्पन्न गर्ने राष्ट्रिय अभिभारा समेत जनताको साथ लिएर नेपाली कांग्रेसले पुरा गर्ने दावि गरेका छन् । विज्ञप्तिमा लोकतान्त्रिक गठबन्धनका उम्मेदवारहरुलाई विजयी गराउन समेत उनले मतदातालाई आग्रह गरेका छन् ।