चित्रेपानी वनमा वृक्षारोपण

फोटो: भिमसेन पौडेल

२४ असार,हेटौडा ।  हेटौडा ६ मा रहेको चित्रेपानी सामुदायिक वन उपभोक्ता समूहले  वनक्षेत्र भित्र वृक्षारोपण गरेको छ। डावर नेपालको आर्थिक तथा प्राविधिक सहयोगमा समूहले वनक्षेत्रको विभिन्न स्थानहरुमा औषधिजन्य विरुवाको वृक्षारोपण गरेको हो ।

समूहले कुरिलो ३० हजार, टटेलो ३५ हजार, अर्जुन साज ११ सय, जामुन ११ सय, विजय साल १५ सय लगायत विभिन्न प्रजातीका १ लाख विरुवाको वृक्षारोपण गर्ने लक्ष्य रहेको समूहका अध्यक्ष सूर्य बहादुर घलानले बताए ।

वृक्षारोपण कार्य १५ दिन सम्म रहने समूहले जनाएको छ । वृक्षारोपण कार्यक्रम अन्तरगत समूहले २ सय ५० वटा बास समेत रोपेको छ ।

समूहले डावर नेपालको आर्थिक तथा प्राविधिक सहयोगमा अघिल्लो वर्ष पनि करिब २ लाख ५० हजार विरुवाको वृक्षारोपण गरेको डावर नेपालका एशोसियट मेनेजर विष्णु केसीले बताए ।यस कार्यक्रम अन्तरगत समूहमा आवद्ध महिला तथा पुरुष उपभोक्ताहरुलाई समावेश गरिएको छ । यस्ता कार्यक्रमले समूहको दिगो आम्दानी हुने र समूहलाई विभिन्न कार्यक्रममा सहयोग हुने विश्वास समूहले लिएको छ ।

वृक्षारोपण कार्यक्रममा सव डिभिजन वन कार्यालय, हेटौडाका फरेष्टर यदुकुमार घिमिरे, समूहका लेखा संयोजक भानुप्रताप विडारी, सञ्चारकर्मी भीमसेन पौडेल, कार्यसमितिका पदाधिकारी, उपभोक्ता लगायतको सहभागिता रहेको थियो