मकवानपुर क्याम्पसका संस्थापक प्रमुखको प्रतिमा अनावरण

३१ असार, हेटौंडा । मकवानपुर बहुमुखी क्याम्पसका संस्थापक प्रमुख स्वर्गीय मुकुन्द दास श्रेष्ठको अर्धकदको प्रतिमा बिहीबार अनावरण गरिएको छ । श्रेष्ठको प्रतिमा क्याम्पस सञ्चालक समितिका पदाधिकारी र सदस्यहरुले संयुक्तरुपमा अनावरण गरेका हुन् । 
२०३७ सालमा स्वीकृत पाई २०३८ सालबाट पठनपाठन सुरु भएको क्याम्पसको स्थापनाकालदेखिनै स्वर्गीय श्रेष्ठले क्याम्पस प्रमुखको रुपमा काम गरेका थिए । क्याम्पस सञ्चालन गर्ने तयारी भए पनि दक्ष जनशक्तिको अभावमा मुकुन्द दास श्रेष्ठ त्रिचन्द्र क्याम्पसबाट काजमा मकवानपुर क्याम्पस आएका थिए । 
स्वर्गीय श्रेष्ठले स्थापनाकालदेखि २०४५ माघ १० गतेसम्म मकवानपुर बहुमुखी क्याम्पसको प्रमुख भएर काम गरेको मकवानपुर क्याम्पस एल्मुनाईका उपाध्यक्ष प्रताप विष्टले जानकारी दिए । स्वर्गीय श्रेष्ठको प्रतिमा निर्माण गरेर मकवानरको शिक्षा क्षेत्रमा उनले पु¥याएको योगदानको कदर गर्ने एउटा सानो प्रयास मात्र गरेको एल्मुनाईका उपाध्यक्ष विष्टले बताए ।
संस्थापक प्रमुख श्रेष्ठको प्रतिमा मकवानपुरकै मूर्तिकार लक्ष्मण भुजेलले निर्माण गरेका हुन् । श्रेष्ठको प्रतिमा बनाउन हेटौंडा उपमहानगरपालिकाले ४ लाख, क्याम्पसले ५५ हजार र क्याम्पसका पूर्व विद्यार्थहरुले समेत आर्थिक सहयोग गरेको उपाध्यक्ष विष्टले जानकारी दिए ।