जसपाले डा. भट्टराईसहित ९ जना केन्द्रीय पदाधिकारीलाई कारबाही

२९ असार, हेटौंडा । जनता समाजवादी पार्टी नेपाल ( जसपा)ले डा. बाबुराम भट्टराईसहित ९ जना केन्द्रीय पदाधिकारीहरुलाई पार्टीको सबै जिम्मावारीबाट मुक्त गरेको जनाएको छ ।
वीरगन्जमा जारी दुई दिने केन्द्रीय समितिको बैठकले पार्टीको हित र विधान विपरितको कार्य गरेको भन्दै भट्टराई सहितका केन्द्रीय पदाधिकारीहरुलाई पार्टीको पदीय जिम्मेवारबाट मुक्त गर्ने निर्णय गरेको हो ।
जसपा नेपालले वीरगन्जमा पत्रकार सम्मेलनको आयोजना गर्दै पार्टी अध्यक्ष उपेन्द्र यादवले पार्टीको नीति तथा सिद्धान्त र विधान विपरितको कार्य गरेकाले डा. बाबुराम भट्टराई, महेन्द्र राय यादव, गंगानारायण श्रेष्ठ, प्रसान्त सिंह, रमेश यादव, हिसिला यमी, भगतबहादुर साहसहित ९ जनालाई पदमुक्त गरिएको जानकारी दिए ।
भट्टराईलाई जिम्मेवारीबाट हटाएपछि पार्टीका वरिष्ठ नेता असोक राईलाई पार्टीको संघीय परिषद अध्यक्षमा सर्वसम्मत चयन गरेको पनि अध्यक्ष यादवले बताए ।
बैठकले आगामी प्रतिनिधि तथा प्रदेश सभाको निर्वाचनमा काँग्रेस सहितको पाँच दलीय गठबन्धनमा नै जसपा रहने निर्णय गरेको जानकारी अध्यक्ष यादवको भनाई छ ।
दुई दिनसम्म चलेको केन्द्रीय समिति बैठकले आगामी निर्वाचनका लागि संगठनको सबै तहमा तयारी गर्ने निर्णय गरेको अध्यक्ष यादवले जानकारी दिए ।