हेटौंडामा मालवाहक सवारी सञ्चालनमा समय निर्धाराण

३ साउन, हेटौंडा । हेटौंडा उपमहानगरपालिकाको बजार क्षेत्रमा मालवाहक सवारी सञ्चालनमा समय निर्धारण गरिएको छ । सोमबार उपमहानगरपालिकामा बसेको बैठकले बजार क्षेत्रमा रहेका व्यवसायीले सामान ओसारपसारमा गरेको मनलाग्दीले ट्राफिक व्यवस्थापनमा समस्या भएको भन्दै समय निर्धारण गरेको हो । 
बजारको मुख्य क्षेत्र बाइसाप सडक देखी उत्तर त्रिभुवन राजपथको चौकिटोल ओरालो र दक्षिण मनकाममना चोक हुँदै कान्तिराजपथको सानोपोखराचौकबाट भैरवरोड हँुदै सितलमहल चोकबाट बाइपास क्षेत्र भित्र ठूला सवारी प्रवेशमा रोक लगाउने निर्णय गरएिको हेटौंडा उपमहानगरपालिकाका प्रवक्ता सविन न्यौपानेले जानकारी दिए ।
बजारको ट्राफिक व्यवस्थापनलाई ध्यान दिदै हेटौंडा उपमहानगरपालिकामा बसेको सर्वपक्षिय बैठकले तोकिएको क्षेत्र भित्रको बजार क्षेत्रमा गर्मीको समयमा बिहान ८ बजेदेखी बेलुकी ८ र जाडो समयमा बिहान ८ बजे देखि बेलुकी ७ बजे सम्म मालवाहक सवारीमा प्रवेशमा रोक लगाएको छ । बैठकले राजमार्ग क्षेत्र हुँदै बाहिरिने सवारीलाई भने रोक नलगाउने निर्णय गरेको छ । 
बैठकले हेटौंडा बजारमा देखिएको ट्राफिक समस्या न्यूनीकरणका लागि हेटौंडामा सञ्चालनमा रहेका तीनपाङ्ग्रे साना सवारी व्यवस्थापनको लागि हेटौंडा उपमहानगरपालिका–१ का अध्यक्ष सबिन न्यौपानेको अध्यक्षतामा र बजार क्षेत्रमा देखिएको पार्किङ व्यवस्थापन मिलाउनका लागि हेटौंडा–२ का अध्यक्ष बिष्णुगोपाल महर्जनको अध्यक्षतामा समिति गठन गरेको छ । 
हेटौंडा उपमहानगरपालिकाका मेयर मिनाकुमारी लामाको अध्यक्षतामा भएको बैठकमा पुरानो नारायणी यातायात कम्पनीका सरोज खनाल, मकवानपुर उद्योग वाणिज्य संघका अध्यक्ष कृष्णकुमार गुप्ता, जिल्ला प्रशासन कार्यालय मकवानपुरका प्रशासकीय अधिकृत गुणराज न्यौपाने, ट्राफिक प्रहरी कार्यालयका प्रमुख मुनेन्द्र थापा लगायतको उपस्थिती थियो ।