भेट्रान्स कपको उपाधी सानो गौचरनलाई

१८ कार्तिक, हेटौँडा । हेटौँडा भेट्रानको आयोजनामा हेटौँडा–७ नागस्वतिमा भएको एट ए साईट भेट्रान्स कप राष्ट्रिय फुटबल प्र्रतियोगिताको उपाधी सानो गौचरन भेट्रान्स काठमाण्डौंले हात पारेको छ । 
शनिबार भएको फाइनल प्रतिष्पर्धामा सानो गौचरनले जोरपाटी भेट्रान्सलाई २–० गोल अन्तरले पराजित गर्दै उपाधी हात पारेको हो । पहिलो हाफमा बराबरी खेलेको जोरपाटीले लय गुमाउँदा सानो गौचरनका निमा लामाले दुई गोल गर्दै टिमलाई उपाधी दिलाए ।
शनिबारको खेलको म्यान अफ दि म्याच जोरपाटीका निमा लामा र म्यान अफ दि शिरिज सानो गौचरनका डिफेन्स राकेश श्रेष्ठ घोषित भए । अनुसाशित टोलीमा बगरभाई खलक ५० प्लस घोषित भयो । राष्ट्रिय र स्थानीय गरी ११ टिमको सहभागिता रहेको प्रतियोगितामा विजेताले नगद ६० हजार, उपविजेताले ४० हजारसहित शिल्ड, मेडल र प्रमाणपत्र प्राप्त गरेका छन् भने म्यान अफ द सिरिजले नगद ५ हजार रुपैँया प्राप्त गरेका छन् । 
विजेता, उपविजेता, म्याद अफ द म्याच र म्यान अफ द सिरिज विजेतालाई एन्फा केन्द्रीय सदस्य राजेन्द्र श्रेष्ठ, हेटौँडा वडा नम्बर ७ का अध्यक्ष राजन थापा, खेलकुद विकास समिति मकवानपुरका अध्यक्ष माधव तिमल्सिना, हेटौँडा भेट्रान्सका अध्यक्ष दिपक बज्र्राचार्य लगायतका पुरस्कार प्रदान गरेका थिए ।