गृहिणी शिक्षा र भ्रष्टाचार अन्त्यका लागी अभियान चलाइने

१२ साउन, हेटौंडा । महिला सीप विकास केन्द्र मकवानपुरले देशभर गृहिणी शिक्षा लागू गर्न र भ्रष्टाचार अन्त्यको लागि भन्दै १० दिने सडक अभियान सञ्चालन गर्ने भएको छ । केन्द्रका अध्यक्ष एवं नेपाली कांग्रेसकी नेतृ समेत रहेकी रीता खनालले बिहीबार हेटौंडामा पत्रकार सम्मेलनको आयोजना गर्दै अभियानको बारेमा जानकारी गराएकी हुन् ।
पत्रकार सम्मेलनमा नेतृ खनालले देशभर गृहिणी शिक्षा लागू गर्न र मुलुकमा बढिरहेको बेथिति, भ्रष्टाचार, कुशासनविरुद्ध अभियान सञ्चालन गर्न लागेको जानकारी दिइन् । यसअघि २०६३ सालमा मकवानपुरमा गृहणी शिक्षा आन्दोलन र सहकारी अभियान सञ्चालन गरेपछि तत्कालिन समयमा सरकारले वैकल्पिक शिक्षा प्रणालीको रुपमा ग्रहण गरेको स्मरण गर्दै नेतृ खनालले पुनः उक्त अभियानलाई सञ्चालन गर्न लागिएको बताइन् ।
उनले आजपनि गृहणी शिक्षाका आवस्यकता उत्तिकै रहेको बताउँदै स्थानीय तहहरुले अभियानलाई सहयोग गर्ने विश्वास व्यक्त गरिन् । यस्तै नेतृ खनालले अभियान अन्तर्गत नै तीन तहको सरकार मध्ये प्रदेश तहको सरकार खारेजी आफुहरुको माग रहेको बताइन् । उनले प्रदेश सरकारको खर्च जनताले थेग्नै नसक्ने भन्दै तत्काल प्रदेश खारेजीको प्रकृयालाई अगाडी बढाउनुपर्नेमा जोड दिईन् ।
उनले देशको आर्थिक अवस्था श्रीलंकाको जस्तै अवस्थामा पुग्न लाग्दा समेत दलहरु सत्ताकै वरीपरी घुमेको आरोप लगाउँदै उनीहरुलाई जनता र देशको कुनै वास्ता नभएको टिप्पणी गरिन । नेतृ खनालले देशलाई श्रीलंका पथमा जान नदिन सबै एकजुट हुनुपर्ने बेला आएको बताईन । उनले अभियानको पहिलो चरणमा हेटौंडाबाट पर्चा वितरणबाट सुरु गर्ने जानकारी दिदैँ साउन २१ गतेसम्म अभियानलाई विभिन्न माध्यमबाट गाउँ, टोलसम्म पु¥याउँने बताईन ।