संघ र प्रदेशको निर्वाचन मङ्सिर ४ मा गर्ने सरकारको निर्णय 

file photo

१९ साउन, हेटौंडा । सरकारले सङ्घ र प्रदेशको निर्वाचन आउने मङ्सिर ४ गते गर्ने निर्णय गरेको छ । बिहीबार बसेको मन्त्रिपरिषद्को बैठकले आगामी मङ्सिर ४ गतेका लागि प्रदेश र सङ्घको निर्वाचनको मिति घोषणा गरेको हो ।
मन्त्रिपरिषद् बैठकले आगामी मङ्सिर ४ मा एकै चरणमा सम्पन्न गर्ने गरी निर्वाचनको मिति घोषणा गरेको सरकारका प्रवक्ता ज्ञानेन्द्र बहादुर कार्कीले जानकारी दिए । बुधबार हिजो सत्तारूढ पाँच दलीय गठबन्धनले आगामी मङ्सिर ४ मै संसदीय निर्वाचन गर्ने सहमति गरेको थियो ।
यसअघि निर्वाचन आयोगले आगामी मङ्सिर २ मा प्रदेशसभा र प्रतिनिधिसभा निर्वाचन एकै चरणमा गर्न सरकारसँग आग्रह गरेको थियोे । यसैबीच, सरकारले मङ्सिर ४ गते प्रदेश र सङ्घको निर्वाचन गर्ने घोषणा गरेको निर्णयलाई प्रमुख प्रतिपक्षी नेकपा एमालेले स्वागत गरेको छ । एमाले अध्यक्ष केपी शर्मा ओलीले निर्वाचन अपेक्षित रहेको बताउँदै सरकारको निर्णयलाई स्वागत गरेका हुन् । 
नेपालस्थित विदेशी सञ्चार माध्यमका संवाददाताहरूसँग छलफल गर्ने क्रममा उनले आफूहरूको माग समयमा नै चुनाव गराउनु भएको भन्दै सरकारको चुनाव गर्ने मिति घोषणालाई एमालेले सकारात्मक रुपमा लिएको बताए ।