कैलाशको नागछेडामा पुल बनाउन असम्भव: अध्यक्ष मुक्तान

१ भदौं, कैलाश । मकवानपुरको पश्चिमी क्षेत्र कैलाश गाउँपालिकाका अध्यक्ष लोकबहादुर मुक्तानले गाउँपालिकाको वडा नम्बर ४ र ७ जोड्ने नागछेडामा सम्भाव्यता अध्ययन गर्दा पुल बनाउन सम्भव नभएको बताएका छन् ।
केहीदिनदेखि नागछेडामा जोखिमपूर्ण तरिकाले बच्चा तार्न लागेको भिडियो टिकटकमा भाईरल बनेर जनप्रतिनिधिहरुलाई गालि गर्ने क्रम बढेपछि गाउँपालिका अध्यक्ष मुक्तानले आफ्नो ध्यानाकर्षण भएको बताएका छन् ।
अध्यक्ष मुक्तानका अनुसार पटक÷पटक सम्भाव्यता अध्ययन गर्दा त्यहाँ झोलुङ्गे पुल र पक्की पुल दुवै बनाउन असम्भव देखिएकोले अर्को ठाउँमा पुल बनाउन बजेट विनियोजन भैसकेको जानकारी दिए ।
अध्यक्ष मोक्तानले भने ’नागछेडाबाट १०÷१५ मिनेटको पैदलयात्रामा पुगिने कैलाश गाउँपालिका वडा नं. ४ धुश्राङ र वडा नं. ७ कोठलीटार जोड्ने पक्की पुलको लागि कांग्रेस बागमती प्रदेश सभापति एवं संसदीय दलका नेता ईन्द्रबहादुर बानियाँको विशेष पहलमा प्रदेश सरकारबाट बजेट विनियोजन भैसकेको छ र अब केही दिनमै टेण्डर प्रक्रियामा गएर काम सुरु हुन्छ ।’
चर्चाको लागि नाटकीयरुपमा तयार पारिएको टिकटक भिडियोको भरमा त्यहाँको भौगोलिक अबस्था नबुझी हचुवामा त्यहीँ जन्मेर हुर्केका स्थानीय जनप्रतिनिधिहरु, सांसदहरुलाई गाली गर्ने र अनावश्यकरुपमा सामाजिक सञ्जाल तथा केही सञ्चारमाध्यमले भ्रम सिर्जना गर्न खोजेको प्रति आफ्नो ध्यानाकर्षण भएको अध्यक्ष मुक्तानले बताएका छन् ।