मनहरी १ मा निर्माणाधिन स्वास्थ्यचौकी भवनमा लापरबाही

२ साउन, हेटौंडा । मकवानपुरको मनहरी गाउँपालिका १ नम्बर वडामा निर्माणाधीन स्वास्थ्यचौकी भवनमा लापरबाही भएको पाइएको छ । भवनको ढलानबाट फर्मा निकालेछि लापरबाही भएको खुलेको हो । 
ढलान गरेको स्थानमा बाहिरैबाट रड देखिएको छ । अहिले सामाजिक सञ्जालमा उक्त फोटो समेत भाइरल भएको छ । स्वास्थ्यचौकी भवन निर्माणको काम एउटै लेवलमा नभएको, बिम समेत तोकिएको साइज अनुसार नभएको पाइएको छ । 
ढलानमा भाइब्रेटर नलगाएकोले फर्मा निकालेपछि बाहिरैबाट रड देखिएको स्थानीयको गुनासो छ । यसमा ठेकेदार कम्पनीसंगै प्राविधिकको समेत लापरबाही भएकोले कारबाहीको दायरामा ल्याउनुपर्ने स्थानीयको माग छ । २५ लाख ८४ हजार ४२५ रुपैयाँ बजेटमा २०७७ असोज २९ गते सम्झौता भएको यस भवन २०७८ असोज २८ गतेसम्म निर्माण सम्पन्न गर्ने उल्लेख गरिएको छ । 
२०७९ असार ३१ गतेसम्म निर्माण गर्ने भन्दै पहिलो पटक म्याद थप भएको थियो । उक्त समयमा पनि निर्माण सम्पन्न नभएपछि दोस्रो पटकका लागि आगामी असोज १५ सम्मको म्याद थपिएको छ । प्रोपाइटर प्रदीप घिमिरे रहेको गुरुकुल बिल्डर्सले स्वास्थ्यचौकी भवन निर्माणको ठेक्का पारेको थियो । 
मनहरी १ कै स्थानीय नवराज पौडेलले स्वास्थ्यचौकी भवन निर्माणको जिम्मा लिएर काम गरिरहेका थिए । मनहरी गाउँपालिका १ नम्बर वडा अध्यक्ष शिवप्रसाद खनालले ककाम नै कमजोर गरेकोले अहिले भवनको कमजोरीको फोटो सार्वजनिक भएको प्रतिक्रिया दिए ।
‘यसमा निर्माण कम्पनी, कम्पनीसंग जिम्मा लिएर काम गर्ने पक्ष र प्राविधिकको पनि कमजोरी देखिन्छ’, खनालले भने, ‘यस बिषयमा गाउँपालिका अध्यक्षलाई जानकारी गराएको छु । अध्यक्षज्यूले अनुगमन गर्ने जानकारी दिनुभएको छ ।’ 
यता गाउँपालिका अध्यक्ष रञ्जन कालाखेतीले स्वास्थ्यचौकी भवन निर्माणमा भएको लापरबाहीको बिषयमा जानकारी आएको बताउँदै तुरुन्तै अनुगमनमा जाने बताए । ‘मलाई खबर आएको छ । अनुगमनमा जानेछु । गलत गरेको प्रमाणित भए भुक्तानी रोक्नेछौं’, कालाखेतीले भने । समाचार प्रदेश दैनिकबाट साभर