मकवानपुरका मल्ल र व्यन्जनकार साफ च्याम्पियनको रेफ्री टोलीमा

१५ भदौं, हेटौंडा । अर्को साताबाट श्रीलंकामा सुरु हुने १७ बर्षमुनीको साफ च्याम्पिनसिपको रेफ्री टोलीमा मकवानपुरका युनाल मल्ल सहित दुई रेफ्री छानिएका छन् । 
फिफा रेफ्री कविन व्यन्जनकार र फिफा सहायक रेफ्री मकवानपुरका युनाल मल्लले साफ च्याम्पियनसिपमा रेफ्रीको भूमिका निर्वाह गर्ने अखिल नेपाल फुटबल संघ (एन्फा) ले जनाएको छ । 
व्यन्जनकार सन् २०१८ मा फिफा रेफ्री बनेका थिए । मल्ल २०१७ देखि फिफा सहायक रेफ्री छन् । साफ यू १७ च्याम्पियनसिपमा नेपालले प्रतिस्पर्धा गर्दैछ । भदौ २० देखि भदौ २९ गते सम्म हुने च्याम्पिनसिपमा नेपाल समूह ‘बी’ मा भारत र भुटानसंग रहेको छ । 
नेपालका लागि मुख्य प्रशिक्षक उर्जन श्रेष्ठले आइतबार अन्तिम टोलीको घोषणा गरिसकेका छन् । उक्त टोलीमा मकवानपुरको मनहरी गाउँपालिका रजैयाका कृषल मोक्तानसहित २३ खेलाडी रहेका छन् । 
अर्को साताबाट दशरथ रंगशालामा सुरु हुने महिला साफ च्याम्पियनसिपमा फिफा रेफ्री अन्जना राई र फिफा सहायक रेफ्री राधिका शाक्य रेफ्री टोलीमा रहेका छन् । 
च्याम्पिनसिप भदौ २१ देखि असोज ३ गते सञ्चालन हुनेछ । नेपाल, भुटान र श्रीलंका समूह ‘बी’ मा छन् । त्यस्तै समूह ‘ए’ मा भारत, पाकिस्तान, माल्दिभ्स र बंगलादेश रहेका छन् ।