हेटौंडा जेसिजको सोमबार रक्तदान, फलफूल वितरण र स्लो मोटरसाइकल रेस सम्पन्न

२०भदौं,हेटौंडा  । हेटौंडा जेसिजको सप्ताहव्यापी कार्यक्रम अन्तर्गत आज सोमबार पनि तिन वटा कार्यक्रम सम्पन्न भएको छ।जेसिजले पहिलो कार्यक्रम अन्तर्गत बिहान हेटौंडा-४ हुप्राचौरमा रक्तदान कार्यक्रमको आयोजन गरेको थियो। हेटौंडा जेसिज वर्ष २०२२ अध्यक्ष पवन कुमार कंशाकारको सभाध्यक्षतामा भएको रक्तदान कार्यक्रममा हेटौंडा-४ का वडाध्यक्ष नविन सिग्देलको प्रमुख आतिथ्यता रहेको थियो। रक्तदान कार्यक्रममा १८ जनाले रक्तदान गरेको कार्यक्रम संयोजक सञ्जय कुमार न्यौपानेले बताएका छन्। 
त्यसैगरी जेसिजले दोस्रो कार्यक्रम अन्तर्गत फलफूल वितरण गरेको छ। हेटौंडा अस्पतालमा ४० जना विरामीलाई फलफूल तथा पौष्टिक आहार वितरण गरेको कार्यक्रम संयोजक सुरज कंशाकारले जनाएका छन्।फलफूल वितरण कार्यक्रममा हेटौंडा अस्पतालमा निमित्त मेडिकल सुपरिटेन्डेन्ट डाक्टर रामचन्द्र सापकोटाको प्रमुख आतिथ्यता रहेको थियो। 
त्यसैगरी जेसिजको तेस्रो कार्यक्रम अन्तर्गत दिउँसो स्लो मोटरसाइकल रेस सम्पन्न भएको छ। सितल महल चोकबाट  ओम हल सम्म तोकिएको स्लो मोटरसाइकल रेस कार्यक्रमको प्रमुख अतिथि वडा प्रहरी कार्यालय हेटौंडा,सानोपोखराका प्रमुख प्रहरी निरीक्षक केशर कुमार न्यौपाने रहेका थिए। १५ जना सहभागी उक्त कार्यक्रमको प्रयोजन हेटौंडा-४ मा रहेको आर एस लाइफ स्टाइलले गरेको थियो।प्रतियोगितामा कविदेव सुनार,नवराज त्रिपाठी र प्रतिक कोइराला क्रमश प्रथम,दृतीय र तृतीय भएका थिए। विजयी सबैलाई हेलमेट र प्रमाणपत्र प्रदान गरिएको कार्यक्रम संयोजक किरन आलेले जनाएका छन। तिन वटै कार्यक्रम मा सप्ताहव्यापी कार्यक्रमका मुल संयोजक शीवकुमार श्रेष्ठ,सह संयोजक महेश अधिकारी लगायतको उपस्थिती रहेको थियो । 
सप्ताहव्यापी कार्यक्रम अन्तर्गत भोली मंगलबार बेङ्कर र जेसिज प्रतिनिधी बिच फुटसल,सरसफाइ कार्यक्रम र पौडी प्रतियोगिता आयोजना गरिएको महासचिव विकेशलाल श्रेष्ठले जानकारी दिएका छन्।