थाहा नगरमा असोज १४ बाट बिच भलिबल हुने

२५ भदौं, हेटौंडा । मकवानपुरको थाहा नगरपालिकामा थाहा कला केन्द्रको आयोजनामा जिल्लास्तरीय बिच भलिबल प्रतियोगिता हुने भएको छ । यही असोज १४ देखि १७ गतेसम्म थाहा नगरपालिका–३ स्थित जनकल्याण माध्यमिक विद्यालयको प्राङ्गणमा प्रतियोगिता आयोजना हुने भएको हो । 
आयोजकले शुक्रबार हेटौंडामा पत्रकार सम्मेलनमार्फत पहिलो पटक आयोजना हुन लागेको बिच भलिबलको बिषयमा जानकारी दिएको हो थाहा कला केन्द्रको आयोजना तथा थाहा नगर भलिबल संघको समन्वयमा हुन लागेको प्रतियोगिताको तयारीलाई तीव्र  पारिएको आयोजक संस्थाका अध्यक्ष सानोबाबु मोक्तानले जानकारी दिए । 
थाहा नगरपालिकाको पर्यटन प्रवद्र्धन साथै भलिबल खेलको विकासका लागि थाहा नगरमा पहिलो पटक बिच भलिबल प्रतियोगिता आयोजना गर्न लागेको उनले बताए । करिब ५० टिमको सहभागिता हुने अपेक्षा रहेको उनले बताए । 
असोज १ गते देखि १० गतेसम्म टिम गरिने र दर्ता शुल्क १ हजार १ सय रुपैयाँ तोकेको उनले जानकारी दिए । प्रतियोगितामा प्रथम, द्वितीय र तृतीय हुनेलाई क्रमशः नगद ५० हजार, २५ हजार र १० हजार रुपैयाँ पुरस्कार सहित ट्रफी, मेडल र प्रमाणपत्र प्रदान गरिने छ । 
प्रतियोगिताको अनुशासित टिमलाई र उत्कृष्ट खेलाडीलाई ५÷५ हजार रुपैयाँ सहित ट्रफी प्रदान गरिनेछ । बिच भलिबल प्रतियोगिताको लागि भौतिक रुपमा काम भइरहेको जानकारी दिइएको छ । 
पत्रकार सम्मेलनमा मकवानपुर जिल्ला खेलकुद विकास समितिका अध्यक्ष भेष खड्गी, जिल्ला भलिबल संघ अध्यक्ष बसन्तकुमार सिटौला, कोषाध्यक्ष शंकर कार्की, थाहा नगरपालिका भलिबल संघका अध्यक्ष बसन्त गोपाली, भलिबल संघ हेटौंडा उपमहानगरपालिका अध्यक्ष राजु घले लगायतको आतिथ्यता रहेको थियो ।