मानव विकास सूचकाङ्कमा नेपाल १४३ औं स्थानमा 

google

२७ भदौं, हेटौंडा । मानव विकास सूचकाङ्कमा नेपाल १ सय ४३ औं राष्ट्रमा परेको छ । सन् २०२०÷२१ मा नेपालको स्थान १ सय ४२ औं स्थानमा रहेको थियो । 
संयुक्त राष्ट्रसङ्घीय विकास कार्यक्रम युनडिपीले विश्वभरका १ सय ९१ वटा देशहरुको मानव विकास प्रतिवेदन  सार्वजनिक गर्दै नेपाल १ सय ४३ औं स्थानमा रहेको उल्लेख गरेको छ । प्रतिवेदन अनुसार नेपालले ०.६०२ अङ्क हासिल गर्दै १ सय ४३ औं स्थानमा रहेको हो । 
प्रतिवेदन अनुसार विश्वभर नै मानव विकास सुचकाङ्क ओरालो लागेको छ । युएनडीपीले सूचकाङ्कलाई ४ भागमा विभाजन गरेको छ । जसमा न्युन, मध्यम, उच्च र धेरै उच्च छन् । जसमा नेपाल मध्यमस्तरमा रहेको देखिएको छ । 
सन् २०२१÷२२ मा विश्वभर नै मानव विकासमा गिरावट आएको प्रतिवेदनमा उल्लेख छ । सन् १९९० मा नेपालले ०.३९९ मात्र अङ्क पाएको थियो । ३१ वर्षको अन्तरालमा नेपालले मानव विकास सुचकाङ्कमा ५०.९ प्रतिशत सुधार गरेको प्रतिवेदनमा उल्लेख छ ।
यसैगरी नेपालीहरूको औसत आयू ६८.४ वर्ष रहेको पनि प्रतिवेदनमा उल्लेख छ । प्रतिवेदनले नेपालमा धनी र गरिबबीचको दूरी समेत बढ्दै गएको देखाएको छ । नेपालीहरूको प्रतिव्यक्ति खुद राष्ट्रिय आय वर्षको ३८ सय ७७ डलर रहेको पनि प्रतिवदेनमा उल्लेख छ ।