१९ बर्षमुनिको एसिया कप क्रिकेटको पहिलो खेलमा नेपाल पराजित 

२५ कार्तिक, हेटौँडा । १९ बर्षमुनिको एसिया कप क्रिकेटको पहिलो खेलमा नेपाल पराजित भएको छ ।  मलेसियाको किनरारा ओभल मैदानमा शनिबार भएको आफनो पहिलो खेलमा नेपाल बंगलादेशसँग २ विकेटले पराजित भएको हो ।
नेपालले दिएको १८१ रनको लक्ष्य बंगलादेशले ४० ओभरमा एक बल खेल्न बाँकी छँदै ८ विकेट गुमाएर भेट्टाएको हो । अन्तिम ओभरमा ११ रन बनाउनुपर्ने भएका बेलामा नेपालले पहिलो बलमै एक विकेट लिएपनि त्यसपछिको चार बलमै बंगलादेश विजयी भयो ।
नेपालका कमल सिंह र सन्दीप लामिछानेले २–२ विकेट लिए । बंगलादेशका नइम शेखले ५२ तथा अफिफ हुसेनले ३३ रन जोडे । यसअघि, टस हारेर पहिले ब्याटिङ गरेको नेपालले ४० ओभर १ बलमा १६७ रन बनाउँदा वर्षाले खेल प्रभावित भएको थियो । नेपालका लागी भीम सार्कीले ४० बलमा ४४, रोहितकुमार पौडेलले ५४ बलमा ४० तथा आसिफ शेखले ५२ बलमा ३० रन बनाएका थिए ।
‘डकवर्थ लेविस’ नियमका आधारमा बंगलादेशलाई ४० ओभरमा १८१ रनको लक्ष्य दिइएको थियो ।
यो हारले भने नेपालको सेमिफाइनल यात्रा कठिन बनेको छ । समूह ‘ए’बाट यसअघिको खेलमा भारतले मलेसियालाई २०२ रनले हराएको थियो । आइतबार नेपालको भिडन्त भारतसँग हुनेछ । नेपालले भारतलाई पराजित गर्न सकेमात्र सेमिफाइनल यात्राको ढोका खुला हुनेछ ।
यस्तै, अर्को समूहबाट लगातार दुई जित हासिल गर्दै श्रीलंका सेमिफाइनलमा पुगेको छ । पहिलो खेलमा युएईलाई ७ विकेटले हराएको श्रीलंकाले शनिबार दोस्रो खेलमा अफगानिस्तानलाई ६१ रनले पराजित गरेको छ ।