दुर्घटना न्यूनीकरण गर्न टाइम कार्ड लागू

१५ असोज, हेटौंडा । बागमती प्रदेशमा दुर्घटना न्यूनीकरणका लागि टाइम कार्ड लागू गरिएको छ । चाडपर्व नजिकिएसंगै सडकमा सवारी साधनको अत्याधिक चाप बढ्ने, तीव्र्र गतिमा सवारी चलाउने तथा सवारी नियमको उल्लंघन बढ्ने अवस्थालाई मध्यनजर गर्दै बागमती प्रदेश प्रहरी कार्यालयले टाइम कार्ड लागू गरेको हो । 
सवारी दुर्घटनालाई न्यूनीकरण तथा सवारीको गति नियन्त्रणका लागि बागमती प्रदेश अन्तर्गतका प्रमुख राजमार्गहरुमा टाइम कार्ड लागू गरिएको हो । सिन्धुली जिल्ला हुँदै जाने वीपी राजमार्ग स्थित भिमानदेखि नेपालथोक दुम्जासम्ममा पहिले देखि नै टाइमकार्ड लागू भएकोमा चाडपर्वलाई लक्षित गरी मकवानपुर, चितवन, धादिङ र काभ्रे जिल्लाका प्रमुख राजमार्गमा सम्बन्धित जिल्लाको जिल्ला सुरक्षा समितिको निर्णय गराई शुक्रबारदेखि टाइम कार्ड लागू गरिएको हो । 
मुग्लिङ नारायणगढ खण्ड, पूर्वपश्चिम राजमार्गको चुरियामाई हेटौंडादेखि चितवनसम्म, पृथ्वी राजमार्गको खानीखोला धादिङदेखि मझिमटारसम्म, अरनिको राजमार्गको धुलिखेल दोलालघाटसम्म र वीपी राजमार्गको मंगलटारदेखि काभ्रेमञ्ज्याङ सम्म टाइम कार्ड लागू गरिएको बागमती प्रदेश प्रहरी कार्यालय हेटौंडाका प्रमुख (प्रहरी नायब महानिरीक्षक) किरण बज्राचार्यले जानकारी दिइन् । 
टाइम कार्ड लागू गरिएका राजमार्गमा निश्चित दुरी र समय मिलाई सवारी आवागमनको व्यवस्था मिलाइएको प्रदेश प्रहरी कार्यालयका प्रवक्ता प्रहरी बरिष्ठ उपरीक्षक दीपक रेग्मीले जानकारी दिए । उनका अनुसार टाइम कार्डको पालना नगर्ने सवारी तथा चालकलाई कारबाही गरिनेछ । चाडपर्वको समयमा प्रत्येक बर्ष दुर्घटना बढ्ने गरेको छ । दुर्घटना न्यूनीकरणका लागि भन्दै प्रदेश प्रहरी कार्यालयले टाइम कार्ड लागू गरेको हो ।