जनताको समृद्धिको ठेकेदार हुँ : बानियाँ

२५ कार्तिक, हेटौँडा । प्रदेशसभा मकवानपुर क्षेत्र नम्बर २ को २ का उम्मेदवार इन्द्रबहादुर बानियाँले जनताको समृद्धिको ठेकेदार भएको दावी गरेका छन् । 
मकवानपुरको राक्सिराङमा भएको गाउँपालिकास्तरीय चुनाब प्रचार कार्यालय उद्घाटन गर्दै बानियाँले आफु जीवनको गुजारा गर्न निर्माण व्यवसायमा लागेको बताउँदै आफु जनताको समृद्धिको ठेकेदार पनि भएको बताए । ‘म त जीवन चलाउन पेशामा आवद्ध छु, कम्युनिष्टहरुका नेताहरु राजनीतिबाटै जीवन गुजारा गरिरहेका छन् ।’ उनले कम्युनिष्टहरु ‘कम निष्ट’ हुने भएकाले जनतालाई आवश्वासन मात्रै बाँड्ने गरेको भन्दै जनताको समृद्धिको जिम्मेवारी आफुले लिने दावि गरे ।
राप्रपाका केन्द्रीय सदस्य एवम् प्रतिनिधीसभाको लागि समानुपातिक उम्मेदवार दीपकबहादुर सिँहले एमालेले यस पटकको प्रतिनिधीसभामा पुराना, भ्रष्टाचार गरी बदनाम र बर्षौ गाउँ नगएकाहरुलाई उम्मेदवार बनाएको भन्दै लोकतान्त्रिक गठबन्धनको विजय सुनिश्चित भएको बताए । 
राक्सिराङको निर्वाचन परिचालन समिति संयोजक इश्वर रुम्बाको अध्यक्षतामा भएको कार्यक्रममा नेपाली काँग्रेसका निवर्तमान जिल्ला सभापति रघुरमण न्यौपाने, जिल्ला सचिव बुद्ध लामा, राप्रपाका नेता गोविन्द रिजाल, राक्सिराङ गाउँपालिका अध्यक्ष राजकुमार मल्ल, राप्रपाका नेता देव लामा लगायतले मन्तव्य व्यक्त गरेका थिए ।