कक्षा ११ र १२ को वार्षिक परीक्षाको कार्यतालिका सार्वजनिक

file photo

२५ असोज, हेटौंडा । राष्ट्रिय परीक्षा बोर्डले शैक्षिक सत्र २०७९÷०८० को कक्षा ११ र कक्षा १२ को परीक्षा सम्बन्धी वार्षिक कार्यतालिका सार्वजनिक गरेको छ । 
कार्यतालिका अनुसार कक्षा १२ को वार्षिक परीक्षा २०८० साल वैशाख दोस्रो सातामा सञ्चालन गरिनेछ भने नतिजा साउन मसान्तभित्र सार्वजनिक गरिनेछ । यस्तै कक्षा ११ को वार्षिक परीक्षा भने २०८० को बैशाख अन्तिम साताबाट सञ्चालन हुने कार्यतालिकामा उल्लेख छ । 
कक्षा ११ को आंशिक÷ग्रेड वृद्धि परीक्षा २०८० वैशाख महिनाको तेस्रो हप्तादेखि सञ्चालन हुनेछ भने नतिजा भदौ मसान्तभित्र प्रकाशन गरिनेछ । कार्यतालिका अनुसार कक्षा ११ मा भर्ना भएका विद्यार्थीहरूका लागि २०७९ कातिक मसान्तभित्र रजिष्ट्रेसन आवेदन फारम वितरण हुने बोर्डले जनाएको छ ।
२०८० साल वैशाखमा कक्षा १२ को नियमित, आंशिक÷ग्रेडवृद्धि एवं कक्षा ११ को (आंशिक÷ग्रेड वृद्धि) परीक्षार्थीको वार्षिक परीक्षाको समय तालिका २०७९ माघ मसान्तभित्र प्रकाशन हुने र परीक्षा केन्द्र फागुन मसान्तभित्र निर्धारण गरिनेछ । २०७९ चैत मसान्तभित्र विद्यालयहरुलाई विद्यार्थीहरुको प्रवेशपत्र तथा ट्रिप्लिकेट वितरण गरिने उल्लेख गरिएको छ ।