मुलुकमा विदेशी दबाब रोक्न राष्ट्रवादी सरकार बन्नु पर्छः कमल थापा

४ कार्तिक, हेटौंडा । मकवानपुर क्षेत्र नम्बर एकका नेकपा एमालेका उम्मेद्बार राप्रपा नेपालका अध्यक्ष कमल थापाले मुलुकमा विदेशी दबाब र प्रभावलाइ रोक्न राष्ट्रवादी सरकार बन्नु पर्ने बताएका छन् । देशी बिदेशी शक्तिहरुलाई रोक्न एमालेको नेतृत्व आवश्यक रहेको उनको भनाई छ ।
नेकपा एमाले हेटौंडा १२ को निर्वाचन परिचालन कमिटीद्वारा आयोजित बिस्तारीत बैठकलाई सम्बोधन गर्दै विदेशी दवाव रोक्न राष्ट्रवादी शक्ति एकजुट हुनुपर्ने थापाको भनाइ छ ।
मुलुकको स्वाधीनता र स्वाभिमानको रक्षा, राष्ट्रियताको संरक्षण, प्रजातन्त्रको सुदृढीकरण र आर्थिक समृद्धि, भ्रष्टाचार अन्त्यको निमित्त राष्ट्रवादी शक्ति एकठाँउमा उभिनुको बिकल्प नरहेको उनले बताए ।
मुलुकमा बेथिति र कुशासन ल्याउने शक्ति जनताले चिन्नुपर्ने भन्दै थापाले देशमा भैरहेका गलत क्रियाकलाप रोक्न एमालेको नेतृत्वमा सरकार बन्नुपर्ने धारणा राखे । मकवानपुरको अपुरो बिकासको काम सम्पन्न गर्न चुनाबी मैदानमा एमाले सङ्गको सहकार्यमा जनताको सेवा गर्ने आएको थापाको भनाई थियो ।
नेपाली कांग्रेस नेतृत्वमा भएको गठबन्धन निहित स्वार्थका लागि मात्र भएको उनले अरोप लगाए ।
१२ वडा कमिटीका निर्वाचन परिचालन कमिटीका संयोजक अर्जुन अर्यालको सभाध्यक्षता तथा नेकपा एमालेका केन्द्रिय निर्वाचन परिचालन कमिटीका सदस्य अनन्त पौडेलको प्रमुख आतिथ्यतामा भएको कार्यक्रममा जिल्ला अध्यक्ष तथा मकवानपुर क्षेत्र नम्बर १ –ख) का उम्मेद्बार एकालाल श्रेष्ठ, एमाले सचिवालय सदस्य तथा नगर इन्चार्ज सुनिल मोक्तान लगायतको सहभागिता रहेको थियो ।