मकवानपुरमा लोकतान्त्रिक-बाम गठबन्धनको चुनावी संयुक्त कार्यलय उद्घाटन

५ कार्तिक, हेटौंडा । आसन्न प्रतिनिधि सभा र प्रदेश सभा निर्वाचन लक्षित प्रचार प्रसारका लागी लोकतान्त्रिक-बाम गठबन्धनले शनिबार जिल्लास्तरीय  संयुक्त कार्यलयको स्थापना गरेको छ । 
गठबन्धनले हेटौंडा २ कांग्रेस चोकमा रहेको नेपाली कांग्रेस मकवानपुरको कार्यलयमा संयुक्त कार्यलय स्थापना गरेको हो ।
कांग्रेस मकवानपुरका सभापति एवं लोकतान्त्रिक-बाम गठबन्धन मकवानपुर जिल्ला निर्वाचन परिचालन तथा समन्वय समितिका संयोजक बुद्ध लामाको सभाध्यक्षातामा भएको कार्यक्रममा उपस्थित सम्पुर्णले एकैपटक ताली बजाएर कार्यलयको उद्घाटन गरेका थिए । 
कार्यक्रममा एकीकृत समाजवादीका केन्द्रीय उपाध्यक्ष केदार न्यौपाने, नेपाली कांग्रेसकि केन्द्रीय सह-महामन्त्री एवं प्रतिनिधि सभा क्षेत्र नम्बर १ का उम्मेदवार महालक्ष्मी उपाध्यक्ष डीना, प्रदेश १ (क) का उम्मेदवार प्रेम बहादुर पुलामी छिन्तु, (ख) का उम्मेदवार आनन्दराम पराजुली, प्रदेश २ को (क) का उम्मेदवार कुमारी मोक्तान, २ को (ख) का उम्मेदवार इन्द्रबहादुर बानियाँ, माओवादी केन्द्रका जिल्ला समन्वय संयोजक सर्केश घलान, एकीकृत समाजवादीका जिल्ला अध्यक्ष सुर्यप्रसाद न्यौपाने लगाएत गठबन्धन दलका जिल्लास्तरीय नेता तथा कार्यकर्ताहरुको उपस्थिति रहेको थियो । 
कार्यक्रममा बोल्दै संयोजक लामाले जिल्लाभरीका चुनावी गतिविधिको ब्यबस्थापन यहि कार्यलयबाट गर्ने बताए । उनले गठबन्धनका उम्मेदवारहरुलाई जिताउन समेत सबैलाई आग्रह गरे ।