नवलपुरमा जुवाको खालबाट पक्राउ परेकालाई तिहार,छठ मान्न छाडियो

१० कार्तिक,हेटौंडा। कार्तिक ८ गते हेटौंडा-११ नवलपुरमा जुवाको खालबाट पक्राउ परेका ३४ जनालाई तिहार,छठ मान्न छाडिएको छ।लगातार विदा परेकाले यही कार्तिक १४ गते कार्यालय खुलेको दिनमा प्रहरीमा हाजिर हुनेगरी चार्डपर्व मनाउनकै लागि अनुसन्धान अधिकृत र सरकारी वकिलको समन्वयमा छोडिएको मकवानपुरका प्रहरी प्रवक्ता प्रहरी नायब उपरीक्षक टेक बहादुर कार्कीले बताएका छन्।

"पक्राउ परेकाहरुलाई अनुसंधान गरिरहेका अनुसंधान अधिकृत र सरकारी वकिलको समन्वयमा आफन्तको जिम्मा जवानीमा छोडिएको र १४ गते हाजिर गराइनुपर्ने छ"- प्रहरी नायब उपरीक्षक कार्कीले भने। 

मकवानपुर प्रहरीले कार्तिक ८ गते हेटौंडा-११ नवलपुरबाट हार जित हुनेगरी जुवा खेल हुदैछ भन्ने विशेष सुचनाको आधारमा अस्थाई प्रहरी पोष्ट थानाभर्याङ र जिल्ला प्रहरी कार्यालय मकवानपुर खटि गएको प्रहरी निरीक्षकको टोलीले हेटौडा -११ नवलपुर स्थित बैकुण्ठ बलामीको घरमा रहेको ग्यारेजमा जुवा खेलिरहेको अवस्थामा ३४ जनालाई पक्राउ गरेको थियो।प्रहरीले जुवाको खालबाट  कौडा १३ थान, तास १३ बुक र  नगद रु.७३,००० बरामद गरेको र  जुवा तास  खेल्ने, च्याखे थाप्ने,हेर्ने ३३ जना पुरुष र प्रहरीलाई अभद्र ब्यबहार गर्ने एक महिला सहित जम्मा ३४ जना लाई नियन्त्रणमा लिएको थियो ।