ज्येष्ठ नागरिक भत्ता ६५ वर्षमा दिने कांग्रेसको घोषणा

१२ कार्तिक, काठमाडौं । नेपाली कांग्रेसले शनिबार चुनावी घोाषणापत्र सार्वजनिक गरेको छ। घोषणापत्रमा कांग्रेसले पूरा स्थिरताको साथ ५ वर्ष सदन कायम राख्ने प्रतिबद्धता व्यक्त गरेको हो ।
सभापति शेरबहादुर देउवाले सार्वजनिक गरेको घोषणापत्रमा संविधानको रक्षा, राजनीतिक स्थायित्व र समुन्नतिको आधार नेपाली कांग्रेसको नेतृत्वमा अबको सरकार भन्ने नारा राखेको छ ।
कांग्रेसले घोषणापत्रमा चुनावपछिको सरकार आफ्नो नेतृत्वमा बन्ने घोषणा गरेको छ । घोषणापत्रमा ६८ वर्ष नागेकालाई दिइने ज्येष्ठ नागरिक भत्ता क्रमश: ६५ वर्षमा झारिने उल्लेख गरिएको छ । घोषणापत्रमा ५० युनिटसम्म खपत गर्नेलाई बिजुली निःशुल्क दिने योजना छ ।
कांग्रेसले वैदेशिक रोजगारीमा जानुपर्ने बाध्यता हटाउन स्थानीय सरकार र वित्तीय संस्थामार्फत संघीय सरकारको ग्यारेन्टीमा स्वरोजगारीका लागि ऋण दिने घोषणापत्रमा उल्लेख गरेको छ ।
नेपाली नागरिकताको प्रमाणपत्र, जग्गाको नामसारी, सवारी चालक अनुमतिपत्र बाहेकका अन्य सम्पूर्ण सेवा र कागजात सूचना प्रविधिको माध्यम मार्फत सेवाग्राहीलाई घरमै उपलब्ध गराउने प्रणाली विकास गर्ने कांग्रेसको घोषणापत्रमा जनाइएको छ ।