फोस्रा आश्वासन बाँड्नेसंग सावधान रहनुस् : बानियाँ

File Photo

२७ कार्तिक, हेटौँडा । लोकतान्त्रिक गठबन्धनको तर्फबाट मकवानपुर क्षेत्र नम्बर २ को प्रदेश २ का उम्मेदवार ईन्द्रबहादुर बानियाँले यसअघि चुनाव जितेर गाउँ नपुगेका उम्मेदवारहरु पुनः फोस्रा आश्वासन बाँडन पुनः गाउँ पुग्न थालेको भनदै सावधान रहन मतदातालाई सुझाव दिएका छन् । 
कैलाश गाउँपालिका–२ मा सोमबार भएको चुनावी प्रचारप्रसार कार्यालयको उद्घाटनमा उनले मतदाताको मतबाट विजय भएपछि गाउँ नपुगेका नेताहरु भोली विकासको मुल फुटाउने आवश्वासन बोकेर गाउँ पुग्न थालेको भन्दै सचेत रहन आग्रह गरेका हुन् । ‘यहाँबाट जितेर गएका नेताहरु तपाइँहरुको गाउँमा कति पटक आए र गाउँको लागि के गरे ?’ बानियाँले भने–‘हिजो नगर्नेले भोली केही नगर्ने भएकाले मतदान गर्दा विचार पु¥याउनु होला ।’ 
सबैभन्दा बढि मतदाता माझ र निर्वाचन क्षेत्रमा पुग्ने नेतामध्ये आफु पर्ने बताउँदै उनले गाउँ पुगेमात्रै स्थानीयस्तरको समस्या बुझ्न सकिने र समाधान हुने बताए । कार्यक्रममा माओवादीका पूर्व उपकमाण्डर सानु स्याङ्तानसहित माओवादी र एमाले छोडेर ३० जना काँग्रेसमा प्रवेश गरेका थिए । यस्तै गोगनेमा भएको कार्यक्रममा एमाले र माओवादी परित्याग गरी १९ जना काँग्रेसमा प्रवेश गरेका थिए । 
कार्यक्रममा लोकतान्त्रिक गठबन्धनको तर्फबाट प्रदेशसभा सदस्यका समानुपातिक उम्मेदवार जानकी लामा, राप्रपा क्षेत्रीय अध्यक्ष गोविन्द रिजाल, काँग्रेस ४ नम्बर क्षेत्रीय सभापति लोक मुक्तान, राप्रपाका जिल्ला सदस्य देव लामा, काँग्रेस क्षेत्रीय कोषाध्यक्ष बेलबहादुर मोक्तानलगायतले विकासका लागि लोकतान्त्रिक गठबन्धनका उम्मेदवारले जित्नु आवश्यक रहेको बताएका थिए ।