इमान्दार भएर चुनावी अभियानमा लाग्न पराजुलीको आग्रह

१२ कार्तिक, हेटौंडा । सत्तारुढ गठबन्धनको तर्फबाट मकवानपुर क्षेत्र नम्बर १ को प्रदेशसभा निर्वाचन क्षेत्र ‘ख’ का उम्मेदवार नेपाली कांग्रेसका नेता आनन्दराम पराजुलीले गठबन्धनका नेता कार्यकर्ता इमान्दार भएर चुनावी अभियानमा लाग्नुपर्ने बताएका छन् । 
शनिबार हेटौंडा–४ नम्बर वडामा गठबन्धनको प्रचार कार्यालय उद्घाटन गर्दै उनले अबको केहीदिन ५ वटै दलका नेता कार्यकर्ताहरु गठबन्धनका उम्मेदवारलाई जिताउन लागिपर्नुपर्ने बताएका हुन् । 
‘मुलुकलाई अप्ठेरो पर्दा कांग्रेसको नेतृत्वमा गठबन्धन हुँदै आएको छ । हामीले गरेको गठबन्धन पवित्र छ, मुलुकको आवश्यकता अनुसार भएको छ’, उनले भने, ‘हामी घरघरमा पुगेर गठबन्धनको आवश्यकता र महत्व बुझाउँदै हाम्रा एजेण्डा बताउनु जरुरी छ ।’ गठबन्धन दलको मुख्य एजेण्डा स्वास्थ्य, शिक्षा, रोजगारी र भौतिक पूर्वाधार विकास रहेको पराजुलीले बताए । गठबन्धन दलको बिषयमा विरोधीहरुले भ्रम सृजना गर्दै प्रलोभन देखाइरहेको भन्दै उनले त्यसलाई समेत चिर्न जरुरी रहेको औंल्याए । 
मकवानपुरमा स्थानीय तहको निर्वाचनमा समेत गठबन्धन सफल भैसकेको स्मरण गर्दै उनले मंसिर ४ को निर्वाचनबाट गठबन्धनका ६ जनै उम्मेदवार विजयी हुने दावी गरे । गठबन्धनले हारेमा प्रतिगामी तत्वले फेरि टाउको उठाउने पराजुलीको भनाई थियो । कांग्रेस ४ नम्बर वडा सभापति हरिप्रसाद पौडेलको अध्यक्षतामा भएको कार्यक्रममा गठबन्धन दलका नेताहरुले मन्तव्य व्यक्त गरेका थिए ।