राप्रपाको घोषणापत्र: निर्वाचित कार्यकारी प्रधानमन्त्रीको एजेण्डा 

१४ कार्तिक, हेटौंडा । राष्ट्रिय प्रजातन्त्र पार्टीले आज सोमबार प्रदेश र प्रतिनिधिसभा निर्वाचनका लागि घोषणापत्र सार्वजनिक गर्दै प्रत्यक्ष निर्वाचित कार्यकारी प्रधानमन्त्री र अभिभावकीय संस्थाका रुपमा राजसंस्थालाई राख्नुपर्ने प्रस्ताव गरेको छ । 
राप्रपाले जनताबाट प्रत्यक्ष निर्वाचित कार्यकारी प्रधानमन्त्री र देशको अभिभावकका रुपमा राजसंस्थालाई राख्नुपर्ने प्रस्ताव गरेको हो । यस्तै राप्रपाले प्रदेशलाई खारेज गरेर केन्द्र र बलियो स्थानीय तह भएको दुई तहको शासकीय संरचना हुनुपर्ने पनि प्रस्ताव गरेको छ । यस्तै पूर्ण समानुपातिक संसद हुनुपर्ने राप्रपाको प्रस्ताव छ ।  
घोषणापत्र सार्वजनिक गर्दै राप्रपाका अध्यक्ष राजेन्द्र लिङ्देनले २०४६ साल पछिका उच्चपदस्थ नेता र कर्मचारीको सम्पत्ति छानविन गरिनुपर्नेमा आफ्नो पार्टीको जोड रहेको बताएका छन् । उनले उच्चस्तरीय नागरिक अयोग गठन गरी २०४६ पछिका उच्चपदस्थ नेता तथा कर्मचारीको सम्पत्ति छानविन गरी अवैध सम्पत्ति जफत गर्ने कानुनी व्यवस्था गर्ने पनि बताएका छन् ।
एक व्यक्तिले दुई कार्यकालभन्दा धेरै पार्टी अध्यक्ष, प्रधानमन्त्री जस्ता कार्यकारी पदमा बस्न नपाउने, नेपाल बन्द जस्ता कार्यक्रम कहिल्यै नगर्ने राप्रपाको घोषणापत्रमा उल्लेख गरिएको छ ।