डिना र आनन्दरामको एउटै स्वर जितेर पनि काम नगर्नेलाई अब 'इगनोर'

१५ कार्तिक,हेटौंडा । मकवानपुरमा यति बेला संघ र प्रदेशसभाका उम्मेदवार घर दैलो र भेटघाटमा व्यस्त रहेका छन्। उम्मेदवारहरु दैनिक जसो मतदातको घरदैलोमा पुगेर मतदात फकाउन व्यस्त देखिन्छन।

उम्मेदवारहरुले सम्पर्क कार्यालय उदघाटन र स्थापनालाई प्राथमिकता दिदै चुनाव प्रचार प्रसार कार्यालय उदघाटनमा लागिपरेका छन्। यसै क्रममा मकवानपुर क्षेत्र-१ र प्रदेशसभा -१ ( ख) अन्तर्गत पर्ने हेटौंडा-१२ र १३ मा संघ र प्रदेशसभा सदस्य लोकतान्त्रिक बाम गठबन्धनका साझा उम्मेदवार महालक्ष्मी उपाध्याय डीना र आनन्दराम पराजुलीले संयुक्त रुपमा सम्पर्क कार्यालय तथा चुनाव प्रचार प्रसार कार्यालय उदघाटन गरेका छन । 
मंगलबार दिउँसो हेटौंडा-१२ र १३ मा सम्पर्क तथा चुनाव प्रचार प्रसार कार्यालय उदघाटनका क्रममा बोल्दै प्रतिनिधिसभा क्षेत्र नम्बर १ की उम्मेदवार महालक्ष्मी उपाध्याय डीनाले पटक पटक जिताएर पठाएका तर काम नगर्नेलाई मत दिए भन्दा पनि मत नदिई इगनोर गर्ने समय आएको बताइन।  उनले सत्तारुढ बाम लोकतान्त्रिक गठबन्धनले मात्रै देशलाई विकासतर्फ डोहोर्याउन सक्ने दावी गरिन् । ‘नेपालमा अहिलेको यो व्यवस्था ल्याउन गिरिजा प्रसाद कोइराला,प्रचण्ड र माधव नेपालले भुमिका खेल्नु भएको थियो । त्यसैले यो गठबन्धन आजको मात्रै गठबन्धन होइन,विगतदेखी हुदै आएको गठबन्धन हो । यो गठबन्धनले देशलाई विकासतर्फ स्थायित्व दिन्छ’,डिनाले भनिन् । उनले आसन्न निर्वाचनलाई भविष्यसँग जोडेर हेरेर सत्तारुढ गठबन्धनलाई जिताउन आग्रह गरिन् । 
त्यसैगरी प्रदेशसभा सदस्यका उम्मेदवार आनन्दराम पराजुलीले अघिल्लो प्रदेशसभा निर्वाचनमा जिताएर पठाएको व्यक्तीले काम नगरेको आधार प्रस्स्त रहेकोले फेरी पनि सोही दलका उम्मेदवारलाई मत दिने कुरामा मतदाता सजग हुने बेला आएको बताए। उनले काम नगर्नेलाई इगनोर गर्न मतदातालाई अनुरोध गरे ।पराजुलीले सत्तारुढ गठबन्धनको उम्मेदवारहरुको जीत सुनिश्चित भइसकेको भएपनि जनतामाझ आफ्नो एजेण्डा सुनाउनको लागि ठाउँ–ठाउँमा पुगिरहेको सुनाए। उपाध्याय र पराजुली सत्तारुढ गठबन्धन दलको समर्थनमा मकवानपुर प्रतिनिधिसभा क्षेत्र नम्बर १ र प्रदेशसभा १ (ख) मा नेपाली कांग्रेसबाट उम्मेदवार बनेका हुन।