यो बर्ष पनि विजय यूथको सी डिभिजन यात्रा अधुरै

१७ कार्तिक, हेटौंडा । सी डिभिजन हुँदै माथिल्लो लिग खेल्ने उद्देश्यका साथ छनौट प्रतियोगितामा सहभागिता जनाएको मकवानपुरको विजय यूथ क्लव यो बर्ष पनि निराश बनेको छ । अघिल्ला दुई बर्ष पहिलो चरणबाटै बाहिरिएको विजय यूथले यो बर्षपनि सो क्रमलाई निरन्तरता दिएको छ । 
पहिलो चरणको दुई खेलमध्ये एकमा हार र एक बराबरी खेलेको विजय यूथको सी डिभिजन खेल्ने सपनामा यो बर्षलाई अधुरै हुने भएको छ । अब बाँकी एक खेल केवल औपचारिकताको लागि मात्र हुनेछ । बुधबार सिन्धुली एफसीसंगको खेलमा बराबरी गरेसंगै विजय यूथ निराश बनेको हो । सिन्धुलीसंग जितेको भए अन्य खेलको नतिजाले विजय यूथको यात्रा निर्भर गर्ने थियो । 
पहिलो हाफमै २ गोलको अग्रता बनाएपनि त्यसलाई जोगाउन नसक्दा निराश बनेको हो । छैठौं मिनेटमै विजय विश्व लामाको गोल मार्फत विजयले अग्रता लिएको थियो । ३६ औं मिनेटमा आयुर घलानले हेडमार्फत गोल गर्दै अग्रता दोब्बर बनाएको थियो । पहिलो हाफ २–० ले अगााडी रहेको विजय यूथले दोस्रो हाफमा २ गोल खाएको हो । 
दोस्रो हाफको पहिलो मिनेटमै सिन्धुलीका अमृत श्रेष्ठले आकर्षक गोल गर्दै अग्रता कम गरेका थिए । उनको लामो प्रहार सिधै गोलमा परिणत भएको थियो । ६९ औं मिनेटमा सिन्धुलीका अंकित श्रेष्ठले गोल गर्दै खेललाई बराबरीमा ल्याए । त्यसपश्चात दुवै टोलीले गोल गर्न नसक्दा खेल बराबरीमा सकिएको थियो । 
पहिलो खेलमा विजय यूथ साउर्थन एफसीसंग १–० ले पराजित भएको थियो । साउथर्न एफसी लगातार दुई जितसहित समूहको विजेताको रुपमा रहेको छ । विजयले १८ गते शुक्रबार मनमैजु क्लवसंग अन्तिम खेल खेल्नेछ । विजय यूथको डिफेन्स लाइनमा कमजोरी देखिएको थियो ।