मकवानपुरमा मतदान शिक्षा दिइदै

मतदाता शिक्षा दिदै महिला स्वास्थ्य स्वयंसेविका

१९ कार्तिक,हेटौंडा । मंसिर ४ गते हुने प्रतिनिधिसभा तथा प्रदेशसभा सदस्य निर्वाचनलाई मध्यनजर गरेर निर्वाचन आयोगले शुक्रबारदेखि मतदाता शिक्षा कार्यक्रम सुरु गरेको छ । 

मतदाता शिक्षा अन्तर्गत मकवानपुरको १० वटा स्थानीय तहको १ सय २ वटै वडामा वडा तहका कर्मचारीलाई खटाई मतदाता शिक्षा कार्यक्रम सञ्चालन भइरहेको छ। 

बागमती प्रदेश निर्वाचन कार्यालयका प्रमुख लुम्बनाथ पोखरेलले सम्बन्धित स्थानीय तह र वडा कार्यालयको समन्वयमा  स्वास्थ्य स्वयम्सेविकाहरुले मतदान गर्ने, मतपत्र मतपेटिकामा खसाल्ने, मतदान केन्द्रसम्म पुग्नेबारे आम मतदातालाई जानकारी दिने बताए।आसन्न संघ र प्रदेश सदस्य निर्वाचनमा ४ प्रकारको मतपत्र रहने हुदा त्यस बारे मतदातालाई खटिएका प्रतिनिधिले बुझाउने पोखरेलले बताए।आइतबार बागमती गाउँपालिका र बकैया गाउँपालिकामा मतदाताहरुलाई नमुना मतदान गर्न सिकाउने उनले भने । मकवानपुरका दुई निर्वाचन क्षेत्रमा ३ सय ६४ मतदान केन्द्र रहेको छ । जसमा १९ वटा अति संवेदनशील र ६० संवेदशील मतदान केन्द्र छन् । ३ सय ६४ मतदान केन्द्रमा करिब ३ हजार कर्मचारी खटिनेछन् ।जिल्लाका मतदान केन्द्रहरुमा खटिने कर्मचारी कार्तिक २३ गते बुधबारसम्म नियुक्त गरिने जनाइएको छ। मकवानपुरमा अहिले ३ लाख ७ सय ३३ मतदाता रहेका छन् ।मकवानपुर क्षेत्र नम्बर १ मा १ लाख ५० हजार १ सय ५५ जना र मकवानपुर क्षेत्र नम्बर २ मा १ लाख ५० हजार ५ सय ७८ मतदाता रहेका छन् । यस्तै ५ जना तेस्रो लिङ्गी मतदाता रहेका छन्।