गठबन्धनको सरकार बने तेब्बर बजेटः मोक्तान

२० कार्तिक, हेटौंडा । नेकपा माओवादी केन्द्रकी मकवानपुर इन्चार्ज एवं मकवानपुर क्षेत्र नम्बर २ ‘क’ की प्रदेशसभा उम्मेदवार कुमारी मोक्तानले गठबन्धनको सरकार बनेमा भीमफेदी गाउँपालिकामा अहिलेभन्दा तेब्बर बजेट ल्याउँने दावी गरेकी छन् ।
भीमफेदी गाउँपालिका ९ मा लोकतान्त्रिक बाम गठबन्धनको सम्पर्क कार्यालय उदघाटन गरेपछि मोक्तानले गठबन्धनले बोलेको पुरा गरेर बिकास गर्नेमा ढुक्क हुन आग्रह गरिन् ।
‘हामी (प्रदेश सरकार)ले यो गाउँपालिकामा २ अर्ब ८८ करोड बजेट हालेका छौ,’ बागमती प्रदेशकी सामाजिक विकास मन्त्री समेत रहेकी उनले भनिन्, ‘अब फेरी हाम्रो गठबन्धनको प्रदेश सरकार बन्यो भने डबल हैन, तेब्बर बजेट गाउँपालिकामा आउँने छ ।’ 
लोकतान्त्रिक बाम गठबन्धनका प्रतिनिधिलाई अबिश्वास गर्नुपर्ने कुनै ठाउँ नभएको भन्दै गठबन्धन सरकारले आमनागरिकको समस्या समाधानमा पहल गरेको उनको दाबी छ ।
नेपाली काँग्रेस बागमती प्रदेश सभापती एवं मकवानपुर क्षेत्र नम्बर २ ‘ख’ को प्रदेशसभा उम्मेदवार ईन्द्र बानियाँले ‘हावादारी’ केपी ओलीले गणतन्त्र नचाहेको र संविधानको समेत बिरोध गरेका कारण माओवादी–काँग्रेस एकजुट भएको बताए । ‘हामी अहिले गणतन्त्रलाई संस्थागत विकास गर्नेमा छौ, केपी ओली तोड्नेमा छन्, त्यसैले जनताले गठबन्धनलाई जिताउँनुपर्छ,’ उनले भन्नुभयो । गठबन्धनमा आबद्ध भएकाले काँग्रेसले पनि माओवादीलाई भोट हाल्नैपर्ने भन्दै यो बेला पार्टी र चुनाव चिन्ह भन्दा गणतन्त्र र संविधान जोगाउँन सबै गम्भीर बन्नुपर्नेमा जोड दिए ।
कार्यक्रममा नेकपा एकीकृत समाजवादीकी केन्द्रीय सदस्य मुनु सिग्देलले गठबन्धनको सबै प्रतिनिधिले जनतालाई विश्वासघात नगर्ने भन्दै ढुक्क भएर गठबन्धनलाई मतदान गर्न आग्रह गरिन । ‘हाम्रो गठबन्धनका उम्मेदवारले विश्वासघात गर्नुहुन्न, तपाईहरु ढुक्कले गठबन्धनलाई भोट हाल्नुहोस्,’ उनले भनिन् ।
मकवानपुरकै मुख्यमन्त्री भएरपनि एमालेका डोरमणि पौडेलले ३ बर्षमा आफ्नै वडा हेटौंडा ११ मा एउटा पुलबाहेक कतै बजेट नहालेको भन्दै उनले लोकतान्त्रिक बाम गठबन्धनले जितेमा विकास र आर्थिक समृद्धीका लागि भुमिका खेल्ने दावी गरिन् ।