पुलिस, आर्मी र मधेश प्रदेश प्रधानमन्त्री कपको सेमिफाइनलमा 

२२ कार्तिक, हेटौंडा । विभागीय टोली नेपाल पुलिस क्लब, समूह विजेता बन्दै प्रधानमन्त्री कप एकदिवसीय पुरुष क्रिकेट प्रतियोगिताको सेमिफाइनलमा प्रवेश गरेको छ । टियु क्रिकेट मैदानमा आज भएको खेलमा मधेश प्रदेशलाई १ सय ९१ रनले हराउँदै पुलिस समूह विजेता बनेको हो । 
पुलिसले दिएको २ सय ७४ रनको लक्ष्यसहित जवाफी ब्याटिङ गरेको मधेशले २९ ओभर ३ बलमा अलआउट हुँदै ८२ रन मात्र बनाउन सक्यो । त्यसअघि टस जितेर पहिले ब्याटिङ गरेको पुलिसले ४९ ओभर १ बलमा अलआउट हुँदै २ सय ७३ रन बनाएको थियो । जितसँगै समूह ‘बी’ को शीर्ष स्थानमा रहेको पुलिसले ४ खेलमा अपराजित रहँदै ८ अङ्क जोड्यो ।मधेशले ४ खेलमा ५ अङ्क जोड्यो । 
आजको खेलमा पराजित भएपनि मधेश समूह उपविजेताको रुपमा सेमिफाइनलमा पुगेको छ । आजै भएको अर्को खेलबाट विभागीय टोली त्रिभुवन आर्मी क्लब, प्रधानमन्त्री कप एकदिवसीय पुरुष क्रिकेट प्रतियोगिताको सेमिफाइनलमा प्रवेश गरेको छ । मुलपानी क्रिकेट मैदानमा आज भएको खेलमा कर्णाली प्रदेशलाई १ सय ४० रनले हराउँदै आर्मी अन्तिम चारमा पुगेको हो । 
आर्मीले दिएको २ सय ५५ रनको लक्ष्यसहित जवाफी ब्याटिङ गरेको कर्णालीले २८ ओभर ३ बलमा ९ विकेट १ सय १४ रन मात्र बनाउन सक्यो । त्यसअघि टस हारेर पहिले ब्याटिङ गरेको आर्मीले ५० ओभरमा ६ विकेट गुमाएर २ सय ५४ रन बनाएको थियो । 
जितसँगै आर्मीसमूह ‘ए’ को उपविजेता बन्दै ४ खेलमा ६ अङ्क जोड्दै सेमिफाइनलमा पुगेको हो । यस समूहबाट एपीएफ ७ अङ्क जोडेर समूह विजेताको रुपमा अन्तिम चारमा प्रवेश गरिसकेको छ । आर्मीको जितले गण्डकी भने बाहिरिएको छ । कर्णाली पनि अङ्कबिहीन रहँदै पुछारमा रहेर प्रतियोगिताबाट बाहिरिएको छ ।