बीपी कांग्रेस मकवानपुरका समानुपातिक उम्मेदवार नै नेपाली कांग्रेस फर्किए

२३ कार्तिक, हेटौंडा । नेपाली कांग्रेस (बीपी) मकवानपुरबाट समानुपातिक सूचीमा रहेका तीन जना उम्मेदवार नेपाली कांग्रेसमा फर्किएका छन् । मकवानपुर प्रतिनिधिसभा क्षेत्र नम्वर-२ प्रदेशसभा (ख) का समानुपातिकतर्फका उम्मेदवारहरु कुमार बल, रामकुमारी घलान र जानुकी लामाले उम्मेदवारी निस्कृय पार्दै नेपाली कांग्रेसमा फर्किएका हुन् । 
बुधबार हेटौंडामा भएको पत्रकार सम्मेलनमा उनीहरुले अब नेपाल कांग्रेसका उम्मेदवार ईन्द्रबहादुर बानियाँलाई समर्थन गर्ने जनाएका छन् ।
उनीहरुले उम्मेदवारी फिर्ता लिँदै बानियाँलाई समर्थन गरेको बताएका हुन् । आफ्नो उम्मेदवारीले संघीय लोकतान्त्रिक गणतन्त्र, समावेशी सिद्धान्तलगायत प्राप्त उपलब्धीहरु गुम्न सक्ने र व्यवस्था विरोधीहरुलाई नै बल पुग्ने खतरा देखेपछि प्राविधिक रुपमा नमिले पनि राजनीतिक रुपमा उम्मेदवारी स्थगन गरेको उनीहरुले प्रष्ट पारे ।
अबको अभियान गठबन्धनबाट प्रत्यक्ष तर्फका उम्मेदवार ईन्द्रबहादुर बानियाँलाई विजयी गराउने र यसका लागि आफ्ना समर्थक, शुभचिन्तक एवम् सबै मतदातालाइ अपिलसमेत गरेका छन् ।
पत्रकार सम्मेलनमा बानियाँले बल, घलान र लामा सो क्षेत्रकै अगुवा कार्यकर्ता भएको र उनीहरुको समर्थनले विकास चाहने जनता र कांग्रेस कार्यकर्ता उत्साहित भएको बताए । बानियाँले उनीहरुलाई कांग्रेसमा पुनः स्वागत गर्दै सम्मानजनक अवसर दिइने बताए ।
पत्रकार सम्मेलनमा कांग्रेस मकवानपुरका सभापति बुद्ध लामा, सचिव भीमसेन महत, संघीय सभापति लोक मुक्तानल, नेताहरू प्रकाश वर्तौला, टेकनाथ शिवाकोटी लगायत कांग्रेसका  नेताहरुको उपस्थिति रहेको थियो ।