समाचारमा तटस्थता कायम गरौंः अध्यक्ष पोखरेल

२८ कार्तिक, हेटौंडा । नेपाल पत्रकार महासंघका केन्द्रीय अध्यक्ष विपुल पोखरेलले तटस्थता कायम गरेर पत्रकारिता गर्न अनुरोध गरेका छन् । निर्वाचनको समयमा एकपक्षीय पत्रकारिता भएको गुनासो आएको जानकारी दिँदै उनले तटस्थतालाई ध्यान दिन अनुरोध गरेका हुन् । 
नेपाल पत्रकार महासंघको फ्रि मिडिया नेटवर्कले आयोजना गरेको निर्वाचनलाई स्वतन्त्र र निष्पक्ष बनाउन सञ्चार माध्यमको भूमिका बिषयक अन्तरक्रिया कार्यक्रममा बोल्दै केन्द्रीय अध्यक्ष पोखरेलले पत्रकारको आस्था विचार जहाँ भएपनि समाचारमा भने स्वतन्त्र देखिनुपर्ने बताएका । ‘पत्रकार आचारसंहिता पालना गर्दै स्वतन्त्र र तटस्थ भएर पत्रकारिता गर्न जरुरी छ’, अन्तरक्रिया कार्यक्रममा अध्यक्ष पोखरेलले भने, ‘निर्वाचनको समयमा राजनीतिक दल र उम्मेदवारले हामीलाई प्रयोग गर्न सक्ने बिषयमा पनि गम्भीर हुन जरुरी छ ।’ पत्रकारले सामाजिक विश्वास जोगाइराख्नुपर्ने उनको सुझाव थियो । 
समाचारको विषयलाई लिएर निर्वाचन आयोगले स्पष्टीकरण सोधिरहेको घटनाप्रति भने उनले आपत्ति जनाए । ‘पत्रकारलाई नियमन गर्ने निकाय छ । पत्रकार महासंघ, प्रेस काउन्सिल लगायतका नियामक निकायहरु छन् । यी संस्थाले अनुगमन गरिरहेकै छ’, उनले भने, ‘निर्वाचन आयोग सञ्चार माध्यम र सञ्चारकर्मीलाई स्पष्टीकरण सोध्ने, कारबाही गर्ने संस्था होइन ।’ अध्यक्ष पोखरेलले सञ्चार माध्यम र सञ्चारकर्मी सदैव जिम्मेवार भएर प्रस्तुत भइरहेको जानकारी दिँदै निर्वाचनलाई स्वतन्त्र र निष्पक्ष ढंगबाट सम्पन्न गराउन सञ्चार माध्यम जिम्मेवार रहेको बताए ।