समृद्ध समाज दैनिक १३ औं वर्षमा प्रवेश

१ मंसिर, हेटौंडा । हेटौंडाबाट नियमित प्रकाशन हुँदै आएको समृद्ध समाज राष्ट्रिय दैनिकले बिहीबार बार्षिकोत्सव कार्यक्रको आयोजना गरेको छ । पत्रिका प्रकाशनको १२ वर्ष पूरा गरी १३ वर्ष प्रवेश गरेको अवसरमा बार्षिकोत्वस कार्यक्रम गरिएको हो । कार्यक्रमका अवसरमा पत्रिकाले उत्कृष्ट कर्मचारीलाई नगद सहित सम्मान गरेको छ । 
कार्यक्रममा वर्ष कर्मचारीको रुपमा वितरण व्यवस्थापक सञ्जय कुमार श्रेष्ठलाई नगद ५ हजार रुपैयाँसहित सम्मान गरिएको छ । पत्रिकाले विगत बर्षमा जस्तै यसबर्ष पनि कार्यक्रममा उपस्थित सहभागीहरुमा पठन संस्कृतिको विकास गर्ने उद्देश्यले मायाको चिनोको रुपमा पुस्तक समेत वितरण गरेको छ । पठन संस्कृतिको विकास गर्नका लागि पुस्तक वितरणको अभ्यास गरिएको समृद्ध समाज दैनिकका सम्पादक सुरेश श्रेष्ठले बताए । 
कार्यक्रममा बोल्दै वरिष्ठ पत्रकार प्रताप विष्टले समृद्ध समाज दैनिक स्वतन्त्र र निश्पक्ष भई समाचार र विचार प्रस्तुत गर्ने समाचारपत्रको रुपमा परिचित रहेको उल्लेख गरे । उनले आसन्न प्रदेश सभा सदस्य तथा प्रतिनिधि सभा सदस्य निर्वाचनमा उम्मेदवारको मात्रै नभई पत्रकार र सञ्चारगृहहरुको समेत परिक्षण भइरहेको बताए । 
यस्तै कार्यक्रममा पत्रिकाका सम्पादक श्रेष्ठले जवाफदेही र जिम्मेवार पत्रकारिताको अभ्यासमा अग्रसर रहँदै आएको र यसलाई निरन्तरता दिने प्रतिवद्धता व्यक्त गरे ।