हाँडीखोलामा २ वटा पक्की पुल बन्ने, स्थानीय खुसी

file photo

१४ मंसिर, हेटौंडा । मकवानपुरको मनहरी गाउँपालिका अन्तर्गत हाँडीखोलाको भुन्द्रुङ र दर्दरा जोड्ने गरी दुइवटा पक्की पुल बन्ने भएको छ । राप्ति खोलामाथि पक्की पुलको अभावमा बर्षौंदेखि समस्या झेल्न बाध्य स्थानीय पुलको ठेक्का आव्हान भएसंगै खुसी भएका छन् । 
हेटौंडा–१९ बस्तीपुरबाट मनहरी ३ हाँडीखोला भुन्द्रुङ र मनहरी गाउँपालिका–९ रजैयाबाट ५ नम्बर वडा दर्दरा जोड्ने पुलको लागि ठेक्का आव्हान भएको हो । 
बागमती प्रदेश सरकार अन्तर्गतको पूर्वाधार विकास कार्यालय चितवनले पक्की पुल निर्माणका लागि ठेक्का आव्हान गरेको हो । राजमार्गबाट नजिकै रहेर पनि हाँडीखोलाबासीले पक्की पुलको अभावमा बर्षौंदेखि समस्या झेल्न बाध्य रहेका थिए । 
तरकारी खेतीको लागि मुलुकमै प्रख्यात यस क्षेत्रका बासिन्दा पुल बन्ने खबरले निकै खुसी रहेका छन् । अहिले मनहरी गाउँपालिकाको रजैला लामिटार जोड्ने पक्की पुल सञ्चालनमा रहेको छ भने हेटौंडा–१९ सानान्टारबाट हाँडीखोला जोड्ने पक्की पुल निर्माणको क्रममा रहेको छ । 
भुन्द्रुङ र दर्दरा जोड्ने पक्कीपुल निर्माण भएपश्चात साविक हाँडीखोलाबासीलाई थप सहज हुने मनहरी गाउँपालिका अध्यक्ष रन्जन कालाखेतीले दावी गरे । यस्तै मनहरी गाउँपालिका–५ नम्बर वडा अध्यक्ष दीपेन्द्र अधिकारीले रजैया दर्दरा जोड्ने पुल निर्माण भएपश्चात ५ नम्बर वडाको करिब ४ हजार सर्वसाधारण लाभान्वित हुने बताए । समयमै गुणस्तरीय काम गराउनका लागि आवश्यक सहयोग गर्न तयार रहेको उनले बताए ।
भुन्द्रुङ बस्तीपुर जोड्ने पक्की पुल नहुँदा ३ नम्बर वडाको हाँडीखोला, भुन्द्रुङ तथा १ र २ नम्बर वडाका सर्वसाधारण रजैया तथा पदमपोखरीको घुमाउरो बाटो प्रयोग गर्न बाध्य रहेका थिए ।