मानव अधिकार आयोगमा ४ जिल्लाको शून्य उजुरी

१६ मंसिर, हेटौंडा । राष्ट्रिय मानव अधिकार आयोग बागमती प्रदेश कार्यालयमा चालु आर्थिक बर्ष २०७८÷७९ मा मकवानपुरसहित ४ जिल्लाको उजुरी नै नपरेको पाइएको छ । चालु आर्थिक बर्षको मंसिर १५ गते बिहीबारसम्म मकवानपुर, रसुवा, सिन्धुली र भक्तपुर जिल्लाको कुनै उजुरी नआएको बताइएको छ ।
मानव अधिकार आयोग प्रदेश कार्यालयले बिहीबार हेटौंडामा आयोजना गरेको त्रैवार्षिक तुलनात्मक कार्य विवरण सार्वजनिक कार्यक्रममा दिइएको जानकारी अनुसार यस बर्ष काठमाडौंको ८, ललितपुरको ७, नुवाकोट र चितवनको ४÷४, सिन्धुपाल्चोकको ३, काभ्रेपलाञ्चोक, दोलखा र धादिङको २÷२ तथा रामेछापको एउटा गरी बागमती प्रदेशमा यस बर्ष ३३ वटा उजुरी परेको कार्यालय प्रमुख यज्ञप्रसाद अधिकारीले जानकारी दिए । 
कार्यालयमा परेका उजुरी मध्ये सबैभन्दा धेरै नागरिक तथा राजनीतिक अधिकार सम्बन्धि रहेको उनले बताए । मानव अधिकार आयोगको बागमती प्रदेश कार्यालयमा आर्थिक बर्ष २०७६÷७७ मा ६८ वटा उजुरी परेकोमा अघिल्लो आर्थिक बर्ष २०७७÷७८ मा ९८ वटा उजुरी परेको थियो । 
आ.व. २०७६÷७७ मा ७५६ वटा, २०७७÷७८ मा ७२१ वटा र चालु आर्थिक बर्षमा ५९७ वटा विचाराधीन उजुरी रहेको कार्यालय प्रमुख अधिकारीले जानकारी दिए । विशेषगरी नागरिक तथा राजनीतिक अधिकार, आर्थिक, सामाजिक र सांस्कृतिक अधिकार, महिला अधिकार, बाल अधिकार, जातीय विभेद विरुद्धको अधिकार, व्यक्ति बेपत्ता पार्ने कार्य विरुद्ध र आप्रवासी कामदार र तिनको परिवारको अधिकार सम्बन्धि उजुरी पर्ने गरेको पाइएको छ । 
प्राप्त उजुरीमध्ये आ.व २०७६÷७७ मा २११ वटामा अनुसन्धान गरिएको छ । यस्तै अघिल्लो आर्थिक बर्षमा १३३ र चालु आर्थिक बर्षमा १५७ वटा उजुरीमाथि अनुसन्धान गरिएको जानकारी दिइएको छ । राष्ट्रिय मानव अधिकार आयोगबाट कारबाहीमा भने फितलो कार्यान्वयन रहेको बागमती प्रदेश कार्यालय प्रमुख अधिकारीले स्वीकार गरे ।