लक्ष्मीमाया स्मृति भलिबल मंसिर २८ गतेबाट हुने

१८ मंसिर, हेटौंडा । लक्ष्मीमाया बज्राचार्य स्मृति जिल्लास्तरीय खुला रनिङशिल्ड भलिबल प्रतियोगिताको यस बर्षको संस्करण यही मंसिर २८ गतेबाट हुने भएको छ । 
आयोजक बसामाडी जेसीजले आइतबार हेटौंडामा पत्रकार सम्मेलनको आयोजना गरि २० औं संस्करणको भलिबल प्रतियोगिता यही २८ देखि पुष २ गतेसम्म आयोजना गर्ने जानकारी गराएको हो । प्रतियोगितालाई स्वर्ण भण्डारका सञ्चालक ज्योतिरत्न बज्राचार्यले प्रायोजन गर्दै आएका छन् ।
प्रतियोगितामा १० देखि १२ वटा टिमको सहमागिता रहने आयोजक जेसिसका अध्यक्ष चिराग अग्रवालले जानकारी दिए । हेटौंडाको हुप्रचौरमा हुने प्रतियोगिताको विजेताले ६५ हजार र उपविजेताले ३० हजार रुपैयाँसहित ट्रफी, मेडल र प्रमाणपत्र प्राप्त गर्ने अध्यक्ष अग्रवालले बताए । प्रतियोगितामा सहभागी हुन चाहने टिमले मंसिर २६ गते सम्म टिम दर्ता गराउन सक्ने बताइएको छ ।
यस्तै प्रतियोगिताभर विधागत उत्कृष्ट खेलाडीलाई समेत नगदसहित ट्रफीको व्यवस्था गरिएको आयोजकले जनाएको छ । भलिबल प्रतियोगिताको लागि करिब साढे २ लाख रुपैयाँ खर्च हुने आयोजकको अनुमान छ । 
पत्रकार सम्मेलनमा बसामाडी जेसीजका पूर्व अध्यक्ष सरोज अधिकारी, कार्यक्रम संयोजक बसामाडी जेसीजका कार्यकारिणी उपाध्यक्ष सरोज पौडेल, सहसंयोजकमा उपाध्यक्षद्वय अनिल भण्डारी र असिमराज ढुंगाना लगाएतको उपस्थिति रहेको थियो ।