बागमती प्रदेशसभाको बैठकको तयारी पुरा

२६ मंसिर, हेटौंडा । बागमती प्रदेशसभाको दोस्रो कार्यकालको पहिलो अधिवेशनको बैठकका लागि सम्पूर्ण तयारी पूरा भएको छ । सोमबार प्रदेश सचिवालयमा पत्रकार सम्मेलन गर्दै पहिलो प्रदेशसभा बैठकको सम्पूर्ण तयारी पूरा भएको जानकारी दिएको हो । 

पत्रकार सम्मेलनमा बोल्दै सचिवालयका सचिव सचिव कृष्णहरि खड्काले बैठकका लागि आवश्यक पर्ने भौतिक पूर्वाधार निर्माण, मर्मत तथा रंगरोगन लगायतका काम सम्पन्न भएको जानकरी दिए । उनले बैठकको सम्भावित कार्यसूची निर्माण, सांसदहरुलाई स्वागत तथा सपथ ग्रहण, सभामुखको निर्वाचन तालिका, संसदीय दलको व्यवस्थापन लगायत काम सकिएको बताए ।

बैठकका लागि पुरानो भवन मर्मत तथा रंगरोगन लगायतको काम सम्पन्न गरिएको जानकारी दिदैँ उनले निर्वाचन आयोगले प्रदेश सभा सदस्यहरुको नाम राष्ट्रपति समक्ष पेश गरिसकेपछि प्रदेश सभाले बैठक डाक्ने बताए ।

यता प्रदेशसभाको दोस्रो कार्यकाल सुरु हुन लाग्दा समेत प्रदेशसभाको आफ्नै भवन निर्माण सम्पन्न हुन सकेको छैन ।प्रदेशसभाको नयाँ भवन बन्न अझै एक बर्ष लाग्नसक्ने अनुमान गरिएको छ।शिक्षा निर्देशनालय रहेको पुरानै भवनलाई मर्मत सम्भार गरिएको छ । 

यसपटक बागमती प्रदेश सभा ११० मध्ये नेपाली कांग्रेसले ३७, नेकपा एमालेले २७, नेकपा माओवादी केन्द्रले २१, राष्ट्रिय प्रजातन्त्र पार्टीले १३, एकीकृत समाजवादीले ७, नेपाल किसान मजदुर पार्टीले ३ र हाम्रो नेपाली पार्टीले २ सिट पाएका छन् ।