पेट्रोलियम पदार्थको मूल्य घटाउन युवाहरुको माग

६ पुस, हेटौंडा । हामी बाँच्न चाहान्छौं अभियानका युवाहरुले नेपालीको गाँस, बास र कपास जस्ता न्युनतम आधारभूत आवस्यकतामा सरकारले ध्यान दिनुपर्ने माग गरेका छन् । 
मंगलबार हेटौंडामा पत्रकार सम्मेलनको आयोजना गर्दै अभियानमा आवद्ध युवाहरुले गाँस, बास, कपास, स्वास्थ्य र शिक्षालाई नेपालको संविधानले नै मौलिक अधिकारको रुपमा मानेको उल्लेख गर्दै यी चिजको ग्यारेन्ट गर्न सरकार तत्पर हुनुपर्ने बताएका छन् । 
पत्रकार सम्मेलनमा अभियानका तर्फबाट बोल्दै हेटौंडा ५ का युवा दिनेश फुयाँलले हाल बजारमा खाद्य वस्तु लगायत मानिसको दैनिक गुजारा गर्न अति आवस्यक वस्तुहरुको मूल्य अत्यधिक वृद्धि भएकोले धेरैले कष्टकर जीवन भोग्न बाध्य भएको बताए । 
उनले अहिले बजारमा देखिएको मूल्यबृद्धिको विभिन्न कारणहरुमध्ये प्रमुख कारण पेट्रोलियम पदार्थको मूल्यवृद्धि भएकाले सरकारले पेट्रोलियम पदार्थको मूल्य नियन्त्रण गर्नुपर्ने माग गरे । पेट्रोलियम पदार्थमा भएको मूल्यबृद्धिलाई बाहान बनाउँदै व्यापारीअरुले अप्राकृतिक ढंगले मूल्यवृद्धि गर्ने गरेको दावी गर्दै नियमित बजार अनुगमन र पेट्रोलियम पदार्थको मूल्य नियन्त्रणमा सरकारले ध्यान दिनुपर्ने बताए ।
 ‘पेट्रोलियक पदार्थको मूल्यवृद्धि हुनुमा अन्तर्राष्ट्रिय कारण बताईन्छ । तर त्यसमा लगाउँने कर त सरकारले निर्धारण गर्ने हो नि । सरकारले पेट्रोलियम पदार्थमा लगाउँदै आएको कर हटाएर पेट्रोलियम पदार्थको मूल्य घटाउनुपर्छ । जनतालाई राहात दिनु सरकारको कर्तव्य हो ।’ उनले भने । 
पेट्रोलियम पदार्थको मूल्य बृद्धिकै कारण जनताले अन्य उपाभोग्य पदार्थको मूल्यबृद्धि खप्नु परिरहेको उनीहरुको तर्क छ । पेट्रोलिय पदार्थ ढुवानी देखि वितरणसम्मका चरणमा भ्रष्टाचार र चुहावट हुने गरेकाले त्यसतर्फ पनि सरकारको ध्यान पुग्नुपर्ने अभियानकर्मीहरुको माग छ । 
अभियानमा फुयाँलसँगै हेटौंडा ४ का विकास बानियाँ, ६ का राजकुमार बास्तोला, ९ का अमित श्रेष्ठ, सुदिप बर्तौला, दिपेश खड्गी, शिब थापा, सागर सापकोटा, नन्दलाल दास, विनोद पुडासैनी, कृष्णहरी खतिवडा, कपिल अर्याल, द्रोणाचार्य दाहाल सुवास लगाएतका युवाहरुको सहभागीता रहेको छ ।