निर्वाचन लोकतन्त्र र निङ्कुशताबीचको लडाईः डिना

 १मसिर, हेटौँडा । नेपाली काँग्रेसका केन्द्रीय सदस्य एवं प्रतिनिधिसभा सदस्य क्षेत्र नम्बर २ का उम्मेदवार महालक्ष्मी उपाध्याय डीनाले आसन्न निर्वाचन लोकतन्त्र र निरङ्कुशताविरुद्धको लडाई भएको बताउनु भएको छ ।

संयुक्त लोकतान्त्रिक गठबन्धनको हेटौँडा १ को चाइनाक्वाटर र हेटौँडा ११ को नवलपुरमा आज आयोजित प्रचार समितिको कार्यालय उदघाटन कार्यक्रममा उहाँले महिला अधिकार र समावेशीका लागि प्रतिबद्ध रहेको बताउनुभयो । उहाँले प्रतिनिधिसभा र प्रदेशसभा निर्वाचनमा लोकतान्त्रिक शक्तिको जीत सुनिश्चित भएको बताउनुभयो । राप्रपाका केन्द्रीय सदस्य दीपकबहादुर सिंहले विगतमा मकवानपुरबाट कम्युनिष्टहरुले चार पटक जितेपनि जिल्लाको विकास गर्न नसकेको भन्दै हेटौँडामा औद्योगिक क्षेत्रलाई पूर्णता दिन र स्थायी प्रदेश राजधानीका लागि लोकतान्त्रिक गठबन्धनका उम्मेदवारलाई विजयी बनाउनु आग्रह गर्नुभयो ।

प्रदेशसभा सदस्य उम्मेदवार यतिराज सापकोटाले आफूले जनतालाई विकास र समृद्धिसँग जोड्न चाहेको बताउनुभयो । हेटौँडा १ मा काँग्रेस वडा सभापति हरिकृष्ण महर्जनको अध्यक्षतामा भएको कार्यक्रममा काँग्रेसका नगर सभापति आनन्दराम पराजुली, राप्रपाका उमाकान्त गौतम, वडा अध्यक्ष सविन न्यौपाने, दीपा उपाध्यायलगायतले बोल्नु भएको थियो ।

यस्तै हेटौँडा ११ मा काँग्रेसका वडा सभापति विष्णु खनालको अध्यक्षतामा भएको कार्यक्रममा राप्रपाका नेता सीतारामा बर्तौलाले बोल्नु भएको थियो । कार्यक्रममा समानुपातिक उम्मेदवारहरु पवित्रा विक, लक्ष्मी श्रेष्ठलगायतको उपस्थिति रहेको थियो । हेटौँडा ११ मा फूलमान श्रेष्ठ संयोजक र पूणिमा लोप्चन सहसंयोजक रहेको १५१ सदस्यीय चुनाव प्रचार प्रसार समिति गठन गरिएको छ ।