बागमती गोल्डकप  पौष २४ गतेदेखि माघ ३ सम्म हुने

१६ पुस, हेटौंडा । मकवानपुरको बागमती गाउँपालिका खेलकुद विकास समितिको आयोजनामा यहि पौष २४ गतेदेखि ५औं संस्करणको बागमती गोल्डकप फुटबल प्रतियोगिता हुने भएको छ । आयोजक समितीले शनिबार हेटौंडामा पत्रकार सम्मेलन गर्दै प्रतियोगिताको बारेमा जानकारी दिएको हो । 
माघ ३ गतेसम्म चल्ने गोल्डकपमा एक विदेशी टिम सहित १० वटा टिमको सहभागिता रहने आयोजक समितिका अध्यक्ष टिकालाल श्रेष्ठले जानकारी दिए । बागमती ८ स्थित जनता माबिअको खेल मैदानमा हुने प्रतियोगितामा विदेशी टिम अमेरिकन क्लव भुटनिज युथ स्पोर्ट्स क्लबसहित ए डिभिजनका ७ र मोफसलका २ वटा टिमको सहभागिता रहने छ । 
प्रतियोगितामा विभागीय क्लबहरु नेपाल पुलिस क्लब, एपिएफ क्लब, त्रिभुवन आर्मी, मच्छिन्द्र क्लब, हिमालयन शेर्पा क्लब, चर्च ब्वाइज क्लब, जावलाखेल युथ क्लब र मकवानपुर–११ को सहभागिता रहने छ । प्रतियोगिताको उपाधि विजेता टोलीले ८ लाख नगद पुरस्कार सहित ट्रफी र प्रमाणपत्र प्राप्त गर्नेछ भने उपविजेताले ४ लाख नगदसहित ट्रफी र प्रमाणपत्र प्राप्त गर्नेछ । यस्तै प्रतियोगिताको सर्वोत्कृष्ट खेलाडीलाई नगद ५१ हजार पुरस्कार प्रदान गरिने आयोजक समितिका अध्यक्ष श्रेष्ठ बताए ।
यसैगरी प्रतियोगितामा विधागत उत्कृष्ट खेलाडी र प्रशिक्षकले समेत जनही १०÷१० हजार रुपैयाँ सहित ट्रफी र प्रमाणपत्र पाउनेछन् । हरेक खेलको म्यान अफ दि म्याचलाई समेत नगद ५ हजार पुरस्कार प्रदान गरिने आयोजकले जनाएको छ । यसअघि चौँथो संस्करणको उपाधि ‘ए’ डिभिजन क्लब थ्री स्टारले जितेको थियो ।