राष्ट्रिय भेट्रान्सको फाइनलमा बानेश्वर र एबीसी भिड्ने

२२ पुस, हेटौंडा । हेटौंडा–५ स्थित पिप्ले–क्याम्पा रंगशालामा जारी आठौं राष्ट्रिय भेट्रान्स एट ‘ए’ साइड फुटलब प्रतियोगिताको उपाधिका लागि बानेश्वर भेट्रान्स काठमाडौं र एबीसी भेट्रान्स पोखरा भिड्ने भएका छन् । 
शुक्रबार भएको सेमिफाइनलमा बानेश्वर भेट्रान्स काठमाडौंले सिमरा भेट्रान्स बारालाई ४–० गोल अन्तरले पराजित गर्दै उपाधि नजिक पुगेको हो । बानेश्वरको जितका लागि नारायण कार्कीले २ तथा उमेश लामा र युवराज भुजेलले समान एक÷एक गोल गरे । खेलको म्यान अफ द म्याच बानेश्वरका नारायण कार्की घोषित भए । 
यस्तै डिफेण्डिङ च्याम्पियन पोखराको एबीसी भेट्रान्सले टाइब्रेकरमा मनाङ मस्र्याङदी भेट्रान्सलाई ३–२ गोलअन्तरले पराजित गर्दै उपाधि भिडन्त पक्का गरेको हो । निर्धारित समयको खेल गोलरहित बराबरीमा सकिएपछि खेलको निर्णय टाइब्रेकरबाट लिइएको हो । 
टाइब्रेकरमा एबीसीको तर्फबाट विकर्ण श्रेष्ठ, विश्वलाल श्रेष्ठ र नरेन्द्र जंग गुरुङ मुखियाले गोल गर्दा मनाङको तर्फबाट नरेश श्रेष्ठ र शिषिरविक्रम हमालले मात्र गोल गरे । मनाङ मस्र्याङ्दीका चक्रबहादुर तामाङको प्रहार रोकेका एबीसीका गोलरक्षक खिमबहादुर गुरुङ म्यान अफ द म्याच भए । 
प्रतियोगिताको विजेताले १ लाख ११ हजार १११ तथा उपविजेताले ५५ हजार ५५५ रुपैयाँसहित ट्रफी, मेडल र प्रमाणपत्र प्राप्त गर्नेछ । सर्वोत्कृष्ट खेलाडीले १५ हजार, उत्कृष्ट फरवार्ड, डिफेन्स, मिडफिल्ड, गोलकिपर तथा प्रशिक्षकले जनही नगद ५ हजार रुपैयाँसहित ट्रफी र प्रमाणपत्र प्राप्त गर्नेछन् ।
प्रतियोगिताको फाइनल खेल शनिबार दिउँसो २ बजे हुने आयोजकले जानकारी दिएको छ ।