हेटौंडामा सवारी दुर्घटना, मन्त्रीको अङ्गरक्षकसहित तीन घाइते

२३ पुस, हेटौंडा। मकवानपुरको हेटौंडा-१९ नेवारपानीमा मोटरसाइकल र स्कुटर दुर्घटना हुँदा मन्त्रीको अङ्गरक्षक (पिएसओ) र सुरक्षाकर्मीसहित तिन जना घाइते भएका छन्।

शनिबार साँझ पूर्व पश्चिम राजमार्ग अन्तर्गत हेटौडा-१९ नेवारपानीमा चितवनबाट हेटौडा बजारतर्फ आउँदै गरेको प्रदेश २-०३-००५ प ६६७६ नम्बरको मोटरसाइकल र बिपरित दिशा बाट जाँदै गरेको बागमती प्रदेश ०३ ००५ प ५००३ नम्बरको स्कुटर एक आपसमा ठक्कर खाँदा दुवै सवारीका तीन जना घाइते भएका हुन् ।

दुर्घटनामा मोटरसाइकल चालक मकवानपुर मनहरी-७ मनहरी घर भई बिशेष सुरक्षा गण ढल्केबर धनुषा दरबन्दी भई हाल बागमती प्रदेशको श्रम, रोजगार तथा यातयात मन्त्रीको अङ्ग रक्षकको रुपमा खटिएका प्रहरी हवल्दार रामकृष्ण महत्तो, मोटरसाइकलमा सवार चितवन भरतपुर-२२ पटेनी घर भई बागमती प्रदेश मुख्यमन्त्री कार्यालयमा कार्यरत प्रहरी हवल्दार नेत्र बहादुर बुढाथोकी र स्कुटर चालक आन्दाजी १७/१८ बर्षीया हेटौडा-१९ नेवारपानी बस्ने एलिसा श्रेष्ठ घाइते भएको मकवानपुर प्रहरीले जनाएको छ। मोटरसाइकलका घाइते सुरक्षाकर्मीको चुरेहिल र स्कुटर चालकको सन्चो अस्पतालमा उपचार भइरहेको जनाइएको छ। घाइते सबै अवस्था मध्यम रहेको मकवानपुर प्रहरीले जनाएको छ।