हेटौँडा–१६ मा महायज्ञ शुरु

३ मंसिर, हेटौँडा । हेटौंडा उपमहानगरपालिका वडा नम्बर १६ मा रहेको श्रीरामजानकी मन्दिरमा श्रीमद्भागवत रामनाम लक्ष्य हवन धान्याञ्चल महायज्ञ आइतबारबाट शुरु भएको छ । मंसिर ११ गतेसम्म चल्ने महायज्ञको उद्घाटन नेपाल सरकारका उपप्रधान तथा उर्जा मन्त्री कमल थापाले उद्घाटन गरेका हुन् ।

महायज्ञको उद्घाटन गर्दै थापाले हिन्दु धर्मको जर्गेनाको निम्ती यस्ता खालको महायज्ञको आवश्यकता रहेको बताए । मूल समारोह समितिका संयोजक शिवप्रसाद नेपालको सभाध्यक्षतामा भएको उद्घाटन कार्यक्रममा हेटौँडा १६ नम्बर वडाका अध्यक्ष रामकृष्ण कोइराला, मूल समारोह समितिका सहसंयोजक तथा उपवाचक बद्री प्रसाद सापकोटा लगायतले मन्तव्य व्यक्त गरेका थिए । महायज्ञको पहिलो दिन नेपाली कांग्रेसका ३ नम्बर क्षेत्रीय सभापति हेटौंडा–८ कमानेका ताराप्रसाद चौलागाईंले ११ हजार ५ रुपियाँ, हेटौंडा उपमहानगरपालिका वडा नम्बर १६ का अध्यक्ष रामकृष्ण कोईरालाले व्यक्तिगत ५१ हजार १ सय ११ रुपैँया, र वडाको तर्फबाट १ लाख १ हजार रुपैँया सहयोग हस्तान्तरण गरेका थिए ।

महायज्ञ उद्घाटन अघि शोभायात्रा समेत गरिएको थियो । हेटौंडा–६ चौघडामा रहेको बंशगोपाल मन्दिरबाट घडामा जल बोकेर श्रद्धालु भक्तजनहरु महायज्ञ परिसर पुगेका थिए । महायज्ञमा बद्री विशाल शास्त्रीले कथा वाचन गरिरहेका छन् ।